ރާއްޖޭގައި އުފެދުނު އެންމެ މޮޅު އެއް ޑައިރެކްޓަރު ފާތިމަތު ނަހުލާ (ނަހޫ)ގެ ކުރިއަށް އޮތް ފިލްމު "ސޮރީ"ގެ ޝޫޓިން ފަށައިފިއެވެ.
"ދަ ޕްރެސް" އަށް މައުލޫމާތު ދެމުން ނަހޫ ބުނީ ފިލްމުގެ ޝޫޓިން ފަށައިފި ކަމަށާއި ފިލްމުގެ ޝޫޓިން ޖުމްލަ 45 ދުވަސްތެރޭ ނިންމާލަން މަސައްކަތް ކުރާ ކަމަށެވެ. ދިވެހި ފިލްމު އިންޑަސްޓްރީގެ އެންމެ ފުންނާބު އުސް ތަރިން ކަމަށްވާ ޔޫސުފް ޝަފީއު (ޔޫއްޕެ) އަދި މަރިޔަމް އައްޒަ ލީޑު ރޯލުން ފެނިގެންދާ މި ފިލްމުގައި ނަހޫގެ ހަގު އަންހެން ދަރިފުޅުގެ އިތުރުން ނާޝްގެ ދަރިފުޅުވެސް ފެނިގެންދާނެއެވެ. މީގެ އިތުރުންވެސް ގިނަ ތަރިންތަކެއް މި ފިލްމުން ފެނިގެންދާނެއެވެ.
ދާދިފަހުން ވަނީ މި ފިލްމުގެ ތީމް ލަވަ ކިޔަން ފިރިހެން އަދި އަންހެން އަޑެއް ހޯދުމަށް އޮޑިޝަނެއްވެސް އިއުލާނުކޮށްފައެވެ. ތީމް ލަވައިގެ އޮޑިޝަނަށް ކިޔަން ޖެހެނީ މުހައްމަދު ޢަބްދުލް ޣަނީ މި ފިލްމަށް ކިޔައިދީފައިވާ ލަވައެކެވެ. 2019 ވަނަ އަހަރު އިއުލާންކުރި މި ފިލްމަކީ ނަހޫގެ ބޮޑު ބްރޭކަކަށް ފަހު ގެނެސްދޭ އެންމެ ފުރަތަމަ ފިލްމުވެސް މެއެވެ. އަސަރުގަދަ ވާހަކައެއްގެ މައްޗަށް ބިނާކޮށް ގެނެސްދޭ މި ފިލްމަކީ ދިވެހި އޯޑިއަންސް އަށް ކަމުދާނެ ފިލްމެކެވެ.
ނަހޫ ޕްރޮޑިއުސްކޮށް އެންމެ ފަހުން ގެނެސްދިނީ 2017 ވަނަ އަހަރު އާއިޝަތު ރިޝްމީ ޑައިރެކްޓްކޮށްފައިވާ ދިވެހި ފިލްމު "ބޮސް" އެވެ. އެފިލްމަށް ވެސް ދިވެހިންގެ ބޮޑު ތަރުހީބެއް ލިބިގެން ދިޔައެވެ. އެ ފިލްމުގައި ލީޑު ރޯލު ކުޅުނީ މުޅިން އަލަށް ފިލްމީ ދާއިރާއަށް ނުކުތް މުހައްމަދު ޔުނާން އާއި މަރިޔަމް އައްޒަ އެވެ. އެ ފިލްމަކީ ވެސް ބޮޑު ކާސްޓެއް ފެނިގެންދިޔަ ފިލްމެކެވެ.
