އައްޑޫ ސިޓީ އިން ފުރައިގެން މާލެ ދަތުރުކުރި ސީމެކްސް ބޯޓުގެ ފަޅުވެރިޔާ ގެއްލުނު ހާދިސާއާއި ގުޅިގެން އޭނާ ހޯދުމަށް 104 ނޯޓިކަލް މޭލުގެ ސަރަހައްދެއް ބަލައިފިއެވެ.
ފުލުހުން ބުނީ މިހާދިސާއާ ގުޅިގެން ގެއްލުނު މީހާ ހޯދުމަށް ފުވައްމުލަކުގެ އިރުއުތުރުން ކަނޑުގެ ސަރަހައްދުން 104 ނޯޓިކަލް މޭލުގެ ސަރަހައްދެއް ސަދަން އޭރިއާ ސްކޮޑްރަންގެ އުޅަނދުތަކުން ހިންގި ސާޗް އޮޕަރޭޝަން ގައި ބަލައިފައިވާ ކަމަށާއި ނަމަވެސް އަދިވެސް ގެއްލުނު މީހާ ފެނިފައި ނުވާކަމަށެވެ.
ފުލުހުން ބުނީ މި އުޅަނދުގެ ފަޅުވެރިޔާ ގެއްލިގެން ފުލުހުންނަށް ރިޕޯޓުކޮށްފައިވަނީ ރޭ ދަންވަރުގެ ވަގުތެއްގައި ކަމަށެވެ. ފުލުހުން ބުނީ ބޯޓުން ގެއްލިގެން ހޯދަމުން ދަނީ ނޭޕާލު ރައްޔިތެއް ކަމަށްވާ ރާޖު ކުމާރު ނަމަކަށް ކިޔާ މީހެއް ކަމަށެވެ. ފުލުހުން ބުނީ އޭނާ ބޯޓުގައި ނެތްކަން އެގުނީ އައްޑޫ ސިޓީއިން ފުރައިގެން ފުވައްމުލައް ސީޓީ އާ ދެމެދު ކަނޑު މަތިން، ފުވައްމުލައް ސިޓީ އާ 8 މޭލަށް ކައިވެރިވެފައި ވަނިކޮށް ކަމަށެވެ.
އިތުރަށް ފުލުހުން ބުނީ، އައްޑޫ ސިޓީން ރޭ 11:30 ގައި ބޯޓު ފުރި އިރު އޭނާ ބޯޓުގައި ހުރި ކަމަށާއި އަދި ރޭ ދަންވަރު 1:15 ހާއިރު ކެޕްޓަނާ އޭނާ ވާހަކަ ދެއްކިކަމުގެ މައުލޫމާތުވެސް ލިބިފައި ވާ ކަމަށެވެ.
ރާޖު ކުމާރު ހޯދުމުގެ މަސައްކަތް އެމްއެންޑީއެފް އިން ކުރަމުން އަންނައިރު މި މައްސަލަ ފުލުހުން ދަނީ ތަހުގީގު ކުރަމުންނެވެ.
