ދައުލަތުގެ މާލީ ނިޒާމު ހަރުދަނާ ކުރުމަށް އުފެއްދި އިކޮނޮމިކް ރީފޯމް އޮފީހުގެ ކޮމިޝަނަރަކަށް، މީރާގެ ކުރީގެ ޑެޕިއުޓީ ކޮމިޝަނަރު އަސްމާ ޝަފީއު މިއަދު ހަމަޖައްސައިފިއެވެ.
ފިނޭންސް މިނިސްޓްރީން މި މަހުގެ 4 ވަނަ ދުވަހު ކުރި އިއުލާނުގައި ވަނީ އިކޮނޮމިކް ރިފޯމް ކޮމިޝަނަރުގެ މަގާމަށް ކުރިމަތިލާން ހުޅުވާލި މުއްދަތު ހަވެފައި ވަނީ މި މަހުގެ 8 ވަނަ ދުވަހުއެވެ.
އެ މަގާމަށް ގިނަ ބަޔަކު ކުރިމަތިލާފައި ވާ އިރު އެ މަގާމަށް އަސްމާ ހޮވިވަޑައިގެންފައިވާ ކަމަށް ފިނޭންސް މިނިސްޓްރީން ބުނެއެވެ.
ފިނޭންސް މިނިސްޓަރަށާއި މިނިސްޓަރުގެ އެޑްވައިޒަރަށް ރިޕޯޓު ކުރަން ޖެހޭ ރިފޯމް ކޮމިޝަނަރުގެ މަސްއޫލިއްޔަތުތަކުގެ ތެރޭގައި ހިމެނެނީ ނެޝަނަލް ރިފޯމު އެޖެންޑާގައި ހިމެނޭ ކަންކަން ތަންފީޒުކުރުމުގައި އެންމެ އިސްކޮށް މަސައްކަތްކުރުމާއި، ރިފޯމާ ގުޅުން ހުރި ކަންކަމުގައި ފިނޭންސް މިނިސްޓަރަށާއި މިނިސްޓަރުގެ އެޑްވައިޒަރަށް ލަފާ ދިނުމެވެ. ހަމައެއާއެކު އިގްތިސޯދު ސިންދަފާތު ކުރުމުގެ މަސައްކަތްތަކާ ގުޅުން ހުރި ކަންކަން މެކްރޯ އިކޮނޮމިކް ސްޓެބިލިޓީ އެންޑް ރެޒިލިއަންސްގެ ސްޓްރެޓެޖީތައް އެކުލަވާލައި ތަންފީޒު ކުރުން ވެސް ހިމެނެއެވެ.
މީރާގައި 14 އަހަރު މަސައްކަތްކުރެއްވި އަސްމާ ވަނީ އެ އިދާރާގެ ޑެޕިއުޓީ ކޮމިޝަނަރުގެ މަގާމު އަދާކުރައްވާފައެވެ. އޭނާގެ ފަސް އަހަރުގެ ދައުރު ހަމަވީ މިދިޔަ އޮކްޓޯބަރު 31 ގައެވެ.
