ހެކްކުރުމާއި ހުއްދަނެތި ކޮމްޕިއުޓަރު ސިސްޓަމްތަކަށާއި ޑޭޓާ އަށް އެކްސެސްވުން ފަދަ ސައިބާކްރައިމް، ނުވަތަ އިންޓަނެޓު މެދުވެރިކޮށް ކުރާ ކުށްތައް ގާނޫނުލްއުގޫބާތުގައި އަލުން ހިމަނަން މަޖިލީހުން ފާސްކޮށްފިއެވެ.
މި އިސްލާހު ފާސްކުރަން ފެންނަ ކަމަށް، ވޯޓުގައި ބައިވެރިވި 58 މެންބަރުން ވެސް ވަނީ ވޯޓު ދެއްވައިފައެވެ.
ގާނޫނުލްއުގޫބާތަށް ސަރުކާރުން ހުށަހެޅީ އިންޓަނެޓް މެދުވެރިކޮށް ކުރާ ކުށްތައް ބަޔާންކޮށް ގާނޫނުލްއުގޫބާތަށް ބާބެއް އިތުރުކުރުމަށެވެ. މި އިސްލާހުގައިވާ ގޮތުން، ކޯޓު އަމުރެއްގެ ދަށުން، ނުވަތަ ގާނޫނަކުން ހުއްދަލިބިގެން ދޫކޮށްފައިވާ ހުއްދައިގައި ބަޔާންކުރާ ގޮތެއްގެ މަތިން، ކޮމްޕިއުޓަރަށް، ނުވަތަ ޑޭޓާ އަށް އެކްސެސްވުމަކީ ކުށެއްނޫނެވެ.
ގާނޫނުލްއުގޫބާތަށް ގެނައި މި އިސްލާހުގައި ބަޔާންކޮށްފައިވާ ކުށްތަކަކީ:
- ހުއްދަނެތި ކޮމްޕިއުޓަރުތަކަށް އެކްސެސްވުން
- އިތުރު ކުށެއް ކުރުމަށް މަގުފަހިކުރުމުގެ ނިޔަތުގައި ހުއްދަނެތި ކޮމްޕިއުޓަރުތަކަށް އެކްސެސްވުން
- ހުއްދަނެތި ކޮމްޕިއުޓަރު ޑޭޓާ އިންޓަސެޕްޓުކުރުން
- ހުއްދަނެތި ކޮމްޕިއުޓަރު ޑޭޓާއަށް އިންޓަފިއާކުރުން
- ނަހަމަގޮތުގައި ޑިވައިސްތައް ބޭނުންކުރުން
- ސައިބާ ވަޔަލެންސްގެ އަމަލުތައް
- ކޮމްޕިއުޓަރާ ގުޅުންހުރި ފޯޖަރީގެ އަމަލުތައް
- ކޮމްޕިއުޓަރާ ގުޅުންހުރި އޮޅުވާލުމުގެ އަމަލުތައް
- ކޮޕީރައިޓާއި އެއާ ގުޅޭ އެހެނިހެން ހައްގުތަކަށް އަރައިގަތުމުގެ އަމަލުތައް
މިފަދަ ކުށެއް ކުރިކަން ސާބިތުވެއްޖެ ނަމަ، އަހަރަކަށް ވުރެ ގިނަ ދުވަހަށް ޖަލަށްލުމަށް ކަނޑައެޅުމަށް ވެސް، ހުށަހެޅި އިސްލާހުގައިވެއެވެ.
