އެމްއެންޑީއެފްއިން ސިލްސިލާކޮށް ބާއްވަމުން އަންނަ އަސްކަރީ ތަމްރީން އެކްސަސައިޒް "ރަންނަމާރި ހަންޓް" މިއަދު ފަށައިފިއެވެ.
އެކްސަސައިޒް "ރަންނަމާރި ހަންޓް" އަކީ ސިފައިން އަދާކުރަންޖެހޭ އޮޕަރޭޝަނަލް ޓާސްކްތަކަށް ތަމްރީނުކޮށް، ސިފައިންގެ ގާބިލްކަން އިތުރުކުރުމަށާއި، އެމްއެންޑީއެފް އޭރިއާ ކޮމާންޑްތަކުގެ އޮޕަރޭޝަނަލް ރެޑިނަސް އަދި ކޭޕެބިލިޓީ ދެނެގަނެ އިތުރަށް ހަރުދަނާކުރުމަށް އަޅަން ޖެހޭ ފިޔަވަޅުތައް ދެނެގަތުމުގެ މަގްސަދުގައި ސިފައިންގެ ލެވެލްގައި ބާއްވަމުން ގެންދާ އެކްސަސައިޒެކެވެ.
މި މަހުގެ 8 އިން 19 އަށް ބަންޑާރަކޮށީ އޮޑިޓޯރިއަމްގައި ކުރިއަށްދާ މި އެކްސަސައިޒްގައި ބައިވެރިވެފައި ވަނީ އެމްއެންޑީއެފް ހުރިހާ ކޯތަކެއް ހިމެނޭ ގޮތުން ޖުމްލަ 39 ބައިވެރިންނެވެ.
އެކްސަސައިޒް "ރަންނަމާރި ހަންޓް" ގެ މަގުސަދަކީ އެމްއެންޑީއެފް ސަރވިސްތަކުގެ މެދުގައި އޮޕަރޭޝަންތައް ހިންގުމުގައި ޖޮއިންޓްނެސް ވަރުގަދަ ކުރުމާއި އަދި ޖޮއިންޓް ޕްލޭނިންއަށް އަހުލުވެރި ކުރުވުމުގެ ގޮތުން، ޖޮއިންޓް ޕްލޭނިން ޕްރޮސެސް (ޖޭޕީޕީ) ކިޔަވައިދީ، އަމަލީ މައިދާނުގައި ބޭނުންކުރާނެ ގޮތް ދަސްކޮށްދިނުމެވެ.
މި އެކްސަަސައިޒް ފެށުމުގެ ގޮތުން ބަންޑާރަކޮށީ އޮޑިޓޯރިއަމްގައި މިއަދު ބޭއްވި ހާއްސަ ރަސްމިއްޔާތު ޝަރަފުވެރިކޮށްދެއްވީ ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާޙީމް ހިލްމީ އެވެ. އެކްސަސައިޒް ރަންނަމާރި ހަންޓް ފެށުމުގެ ރަސްމިއްޔާތުގައި ޗީފް އޮފް ޑިފެންސް ފޯސްގެ އިތުރުން ހުރިހާ ކޯތަކުގެ ކޮމަޑާންޓުން ވަނީ ބައިވެރިވެވަޑައިގެންފައެވެ.
