މާލެ ވޯޓާ އެންޑު ސްވެރެޖް ކޮމްޕެނީ، (އެމްޑަބްލިޔުއެސްސީން) މޯލްޑިވްސް ސްޓޮކް އެކްސްޗޭންޖުގައި 200 މިލިއަން ރުފިޔާގެ ބޮންޑު ވިއްކަން ހުޅުވާލައިފިއެވެ.
ތަރައްގީގެ މަސައްކަތްތަކަށާއި ކުންފުނީގެ ވިޔަފާރި ފުޅާކުރުމަށް ބޭނުންވާ ފައިސާ ހޯދުމަށްކަމަށް އެމްޑަބްލިއުއެސްސީއިން 400 މިލިޔަން ރުފިޔާގެ ބޮންޑެއް ވިއްކުމަށް ވަނީ ނިންމާފައެވެ. އެމްޑަބްލިއުއެސްސީއިން މި ބޮންޑު 2 މަރުހަލާއަކަށް ބަހާލައިގެން ވިއްކުމަށް ނިންމާފައިވާއިރު އެމްޑަބްލިޔުއެސްސީގެ ވިޔަނި ޕޯޓަލް މެދުވެރިކޮށް، އިންވެސްޓުކުރުމުގެ ފުރުސަތު މިހާރު ހުޅުވާލާފައިވަނީ 200 މިލިޔަން ރުފިޔާގެ ބޮންޑަކަށެވެ.
މި ބޮންޑު ބާޒާރުން ހޯދުމަށް އެކުންފުނިން ނިންމާފައިވަނީ ފަސް އަހަރު ދުވަހުގެ މުއްދަތަކަށް ބާލާއިރު، 7.5 އިންސައްތައިގެ އިންޓަރެސްޓު ރޭޓެއްގައެވެ.
އެމްޑަބްލިޔުއެސްސީއަށް ލިބޭ އާމްދަނީ ހިއްސާކުރަނީ، ފެނުގެ ހިދުމަތްތަކުގެ އަގުން 55 އިންސައްތަ އަދި ކުންފުނިން ހިންގާ މަޝްރޫއުތައް ހިމެނޭ ގޮތަށް ނޮން ޔުޓިލިޓީ އާމްދަނީގެ ގޮތުގައި 45 އިންސައްތަކަމަށްވާއިރު އެ ކުންފުނީގެ އަމާޒަކީ ކުންފުނި ހިންގުމަށްޓަކައި، ހިންގާ މަޝްރޫއުތައް އިތުރުކޮށްގެން ނޮން ޔުޓިލިޓީ އާމްދަނީ، ޖުމްލަ އާމްދަނީގެ 60 އިންސައްތަ އާ ހަމައަށް އިތުރުކުރުމެވެ.
