ކޮރެއަން ޕެނިންސުލާގައި އޮންނަ އެމެރިކާގެ މިތުރު ދެކުނު ކޮރެއާގެ ރައީސް، މަގާމުން ދުރުކުރަން އިދިކޮޅު ފަރާތްތަކުން ފަށައިގަތުމުން އިއުލާން ކުރި މާޝަލްލޯ ގާނޫނު ހަދާ މަޖިލީހުން ބޭރުކޮށްލައިފިއެވެ.
ދެކުނު ކޮރެއާގައި ވެރިކަން ވެއްޓިދާނެ ފަދަ ހާލަތަކަށް ގޮސްފައި ވާ އިރު، އިދިކޮކޮޅު 6 ޕާޓީއަކުން ވަނީ ރައީސް އަޒުލު ކުރުމަށް ހުށަހަޅާފައެވެ.
އިދިކޮޅު ފަރާތްތަކުން ރައީސް ޔޫން ސުކް ޔިއޯލް ވެރިކަމުން ދުރުކުރަން މަސައްކަތް ކުރަމުން ދާ އިރު އޭނާ ނިސްބަތްވާ ޕާޓީގެ ތެރެވެސް ވަނީ ދެބައިވެ އޭނާއާ ދެކޮޅު ރޫހެއް އުފެދިފައެވެ.
ހުސްވި އޭޕްރީލްގައި އެގައުމުގައި އޮތް ގާނޫނު ހަދާ މަޖިލީހުގެ އިނތިހާބު އިދިކޮޅު ފަރާތްތަކުން ކާމިޔާބު ކުރުމާއެކު ވެރިކަން ވެރިކަން ދެމެހެއްޓެވުމަށް ޔޫން އަށް ވަނީ ގޮންޖެހުންތަކާ ކުރިމަތިވެވަޑައިގެންފައެވެ. އެގޮތުން މަޖިލީހުގެ ތެރެއިން ސަރުކާރުގެ ބަޖެޓުން ބޮޑުބައެއް ކަނޑާލައި ދަތުކުރަން ފެށުމުގެ އިތުރުން ސަރުކާރުގެ އިސް އޮފިޝަލުން އަޒުލް ކުރުމުގެ މަސައްކަތް ވަނީ ފަށައިގެންފައެވެ.
ޔޫން ވިދާޅުވީ، ގާނޫނު ހަދާ މަޖިލީހުގެ އެ އަމަލަކީ 'މަޖިލީހުގެ ބަޣާވާތެއް' ކަމަށާއި އެކަމުގެ ސަބަބުން ވެރިކަން ކުރެއްވުމުގައި އޭނާއަށް ގޮންޖެހުންތަކާ ކުރިމަތިވެފައި ވާ ކަމަށެވެ. އެހެން ކަމުން މާޝަލްލޯ އިއުލާން ކުރެއްވުމަކީ ވެރިކަން ދެމެހެއްޓުމަށްޓަކައި ކޮންމެހެން ކުރައްވަން ޖެހިވަޑައިގަންނަވާ ކަމެއް ކަމަށް ވިދާޅުވެ މާޝަލްލޯ ތަންފީޒު ކުރައްވަން ފެއްޓެވިއެވެ. އެއާއެކި ހަތިޔާރު އެޅި ސިފައިން ސިޓީތަކާއި ސަރުކާރުގެ އިދާރާތަކުގެ އިތުރުން މަޖިލީސް ކުރާ ގެ ބަލަހައްޓަމުން ދަނިކޮށް، ގާނޫނު ހަދާ މަޖިލީހުން ރޭ ވަނީ މާޝަލްލޯ އުވާލާފައެވެ. އެއާއެކު ސިފައިން މަޖިލީސް ކުރާ ގެ ދޫކޮށް ދިޔަނަމަވެސް އާންމު ރައްޔިތުން ވަނީ މަގުތަކަށް ނިކުމެ ރައީސްގެ އިސްތިއުފާ އަށް ގޮވަން ފަށާފައެވެ.
އާންމުން ބުނަމުން ދަނީ، ޔޫން އަށް ޖެހިވަޑައިގަންނަވާނީ އިސްތިއުފާ ދެއްވުމަށް ކަމަށެވެ.
