ވަގަށް ނެގި ފޯނުގެ ސިމް ބޭނުންކޮށްގެން ސިމުގެ ވެރިފަރާތަށް ގުޅައި، ފައިސާ ހޯދުމަށް ޑިމާންޑުކުރަމުން ދިޔަ މީހަކު ފުލުހުންގެ ބެލުމުގެ ދަށަށް ގެންގޮސްފިއެވެ.
މި މައްސަލައިގައި ހައްޔަރު ކުރި 35 އަހަރުގެ މީހާ ގެ ބަންދު އަމުުރުގައި ބުނެފައި ވަނީ މީހަކު ގެއްލިގެން ފުލުހުންނަށް ރިޕޯޓްކޮށްފައިވާ ސިމް ބޭނުންކޮށްގެން، އެ މީހާއަށް ގުޅައި، ފައިސާދޭން ބުނެ ވަކި ތަނަކަށް ދާން އެންގި ކަމަށެވެ.
ކޯޓު އަމުރުގައި އިތުރަށް ބުނެފައިވަނީ ސިމުގެ ވެރިފަރާތުން ފުލުހުންނަށް އެކަން އެންގުމުން ފުލުހުން އެތަނަށް ދިޔައިރު ފޯނު ވަގަށް ނެގި މީހާ އެތަނުގައި ހުރި ކަމަށެވެ. އަދި އޭނާ އަތުގައި އޮތް ފޯނުން، އެ ސިމްކާޑު ފެނުނު ކަމަށް ފުލުހުން ބުނެފައިވާކަމަށް ކޯޓު އަމުރުގައި ފާހަގަކޮށްފައިވެއެވެ.
މި މައްސަލައާ ގުޅިގެން ބަންދުގެ މުއްދަތް ޖެހުމަށް ހާޒިރުކުރުމުން އޭނާ ވަނީ އެކަމަށް އިންކާރުކޮށްފައެވެ. އަދި އޭނާ އަތަށް ރައްޓެއްސަކު ފޯނު ދީފައި މީހަކު އަތުން ފައިސާ ނަގައި ދިނުމަށް އެދުމުން އެތަނަށް ދިޔައީކަމަށް އޭނާ ބުންޏެވެ. އަދި މިއީ އޭނާއާ ގުޅުން ހުރި ކަމެއް ނޫން ކަމަށްވެސް ކޯޓުގައި މި މީހާ ވަނީ ބުނެފައެވެެ. މި މައްސަލައާ ގުޅިގެން އޭނާގެ ބަންދަށް ކްރިމިނަލް ކޯޓުން ވަނީ 10 ދުވަސް ޖަހައިފައެވެ.
