މަނީ ޗޭންޖިން ވިޔަފާރި ކުުރުމަށް ލައިސަންސަށް އެދި ހުށަހެޅުމުގެ މުއްދަތު ހަމަވިއިރު ލައިސަންސް އާނުކުރާ 163 ފަރާތެއްގެ ލައިސަންސް ބާތިލުކޮށްފައިވާ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފިއެވެ.
"މަނީ ޗޭންޖިން ވިޔަފާރިއާ ބެހޭ ގަވާއިދު" ގައިވާ ގޮތުގެ މަތިން ރާއްޖޭގައި މަނީ ޗޭންޖިން ވިޔަފާރި ކުރުމަށް ލައިސަންސް ހޯދުމަށް އެދި އެޕްލިކޭޝަން ހުށަހެޅުމަށް އެމްއެމްއޭއިން ވަނީ މިދިޔަ އޮކްޓޫބަރު މަހުގެ 2 ވަނަ ދުވަހު ހުޅުވާލާފައެވެ. މިދިޔަ ހޮނިހިރު ދުވަހުގެ ނިޔަލަށް ވަނީ ހަމަވެފައިވާ އިރު، މިއަދު އެމްއެމްއޭ އިން ބުނީ ހުޅުވާލި ފުރުސަތުގައި ޖުމްލަ 98 ފަރާތުން ލައިސަންސަށް އެދި ހުށަހަޅާފައިވާ ކަމަށެވެ.
މީގެކުރިން މަނީޗޭންޖާ ލައިސަންސް 212 ފަރާތަކަށް ދޫކޮށްފައިވާ އިރު، 134 ކޮމާޝަލް ވިޔަފާރި އާއި 76 ޓޫރިސްޓް ރިސޯޓް ހިމެނެއެވެ. އެ ފަރާތްތަކުގެ ތެރެއިން އާ ގަވާއިދުގެ ދަށުން ލައިސަންސަށް އެދި ހުށަހަޅާފައި ނުވާ 163 ފަރާތެއްގެ ލައިސަންސް ބާތިލުކޮށްފައިވާ ކަމަށް އެމްއެމްއޭ އިން ބުނެއެވެ. ލައިސަންސް ބާތިލްކުރި ފަރާތްތަކުގެ ތެރޭގައި ހިމެނެނީ 99 ކޮމާޝަލް ވިޔަފާރި އާއި 64 ރިސޯޓު ހިމެނެއެވެ.
ލައިސަންސްއަށް އެދުމަށް ހުޅުވާލި ފުރުސަތުގައި ހިދުމަތް ދެމުން އަންނަ ފަރާތްތަކުގެ ތެރެއިން 49 ފަރާތަކުން ވަނީ ލައިސަންސަށް އެދި ހުށަހަޅާފަ އެވެ. އެއީ ޓިއަ 1 މަނީ ޗޭންޖިން ލައިސަންސްއަށް އެދި 35 ކޮމާޝަލް ވިޔަފާރި އާއި ޓިއަ 2 މަނީ ޗޭންޖިން ލައިސަންސަށް އެދި ހުށަހެޅި 14 ރިސޯޓެކެވެ.
މަނީ ޗޭންޖިން ވިޔަފާރި ކުރުމަށް ލައިސަންސް ހޯދުމަށް ހުޅުވާލި ފުރުސަތުގައި 98 ފަރާތަކުން ފޯމް ހުށަހަޅާފައިވާ އިރު އޭގެ ތެރޭގައި މުޅިން އަލަށް 49 ފަރާތަކުން ލައިސަންސަށް އެދި ހުށަހަޅާފައިވާ ކަމަށް އެމްއެމްއޭ އިން ބުނެއެވެ. އެއީ ޓިއަ 1 މަނީ ޗޭންޖިން ލައިސަންސްއަށް އެދި ހުށަހެޅި 44 ފަރާތަކާއި ޓިއަ 2 މަނީ ޗޭންޖިން ލައިސަންސަށް އެދުނު 5 ފަރާތެކެވެ.
ޓިއާ 1 އަކީ ބޭރު ފައިސާ ގަތުމާއި ވިއްކުމުގެ ވިޔަފާރިކުރުމުގެ ލައިސަންސެވެ. ޓިއާ 2 އަކީ ބޭރު ފައިސާ ވިއްކުމުގެ ވިޔަފާރިކުރުމުގެ ލައިސެންސެވެ.
ޓިއަ 1 ގެ ދަށުން އެޕްލިކޭޝަން ފީގެ ގޮތުގައި 20،000 ރުފިޔާ ދައްކަން ޖެހެ އެވެ. ލައިސަންސް އަހަރީ ފީއަކީ 24،000 ރުފިޔާއެވެ. ދުވާލެއްގެ މައްޗަށް އެއް ކަސްޓަމަރަކަށް ނަގުދު ފައިސާއިން އެންމެ ގިނަވެގެން މުއާމަލާތް ކުރެވޭނީ 50،000 ރުފިޔާ ނުވަތަ އެ އަށް ޖެހޭ ބޭރު ފައިސާގެ އަދަދަކަށް ވާން ޖެހޭނެ ކަމަށް އެ ގަވައިދުގައި ވެއެވެ.
ޓިއަ 2 ގައި ހިމެނެން ޖެހޭނީ ޓޫރިޒަމާ ބެހޭ ގާނޫނުގެ ދަށުން ޓޫރިސްޓުން ރިސޯޓު ހިންގަން ހުއްދަ ނުވަތަ ލައިސަންސް ލިބިފައިވާ ކުންފުނިތަކަށެވެ. ޓިއަ 2 ގެ ދަށުން ލައިސަންސް އެޕްލިކޭޝަން ފީގެ ގޮތުގައި ދައްކަން ޖެހޭނީ 1،300 ޑޮލަރެވެ. ލައިސަންސް އަހަރީ ފީގެ ގޮތުގައި 1،800 ޑޮލަރެވެ. ޓިއަ 2 ގައި ހިމެނޭ ފަރާތްތަކުން ބޭރު ފައިސާ ވިއްކުމުގެ މުއާމަލާތް ކުރަން ވާނީ ބޭންކެއް މެދުވެރިކޮށް ނުވަތަ ޓިއަ 1 ގައި ހިމެނޭ ފަރާތަކާ އެކުއެވެ. ލައިސަންސް ލިބިފައިވާ ކޮންމެ ފަރާތަކުން ވެސް ސެކިއުރިޓީ ޑިޕޮސިޓްގެ ގޮތުގައި 50،000 ޑޮލަރު ބަހައްޓަން ޖެހެއެވެ.
މީ ކޮންކަހަލަ ގަވައިދެއް