އިޒްރޭލުން ބައިނަލްއަގުވާމީ ގާނޫނުތަކާ ހިލާފަށް ފަލަސްތީނުގެ ބިންތަކުގައި ހިންގަމުންދާ އަނިޔާވެރި ގަތުލުއާންމުތައް ހުއްޓާލުމަށް ބައިނަލްއަގުވާމީ މުޖުތަމައު ފުރިހަމަ ބާރުގެ ބޭނުންކުރުމަށް، ރައީސް ޑރ. މުހައްމަދު މުއިއްޒު ގޮވާލައްވައިފިއެވެ.
ފަލަސްތީނުގެ ރައްޔިތުންނާ އެކު ތިބިކަން ހާމަކުރުމަށް ފާހަގަކުރާ ދުވަހާ ގުޅުވައި 'އެކްސް'ގައި ލިޔުއްވި ޕޯސްޓެއްގައި ރައީސް ވަނީ، ފަލަސްތީނުން އިންސާފު ހޯދައި ސުލްހަވެރިކަމާ އެކު އުޅުމުގެ ހައްގު ކަށަވަރުކުރުމަށް ކުރަމުންދާ މަސައްކަތުގައި ފަލަސްތީނާ އެކު ރާއްޖެއިން ދެމިތިބޭނެ ކަމުގެ ޔަގީންކަން ތަކުރާރުކުރައްވައިފައެވެ.
"އިޒްރޭލުން ފަލަސްތީނުގެ ބިންތައް އިސްތިއުމާރުކޮށްގެން އޮންނަ އޮތުން ނިމުމަކަށް ގެނެސް، ހަނގުރާމަ އާއި ގަތުލުއާންމުގެ ކުށްތަކުގެ ފަހަތުގައި ތިބި ފަރާތްތައް އިންސާފުގެ ކުރިމައްޗަށް ގެނައުމަށްޓަކައި ބައިނަލްއަގުވާމީ މުޖުތަމައު އެކަތިގަނޑަކަށްވެ، ސިޔާސީ އަދި އިގްތިސޯދީ ބާރުގެ ބޭނުން ހިފުމަށް ގޮވާލަން،" އެމަނިކުފާނު ލިޔުއްވާފައިވެއެވެ.
މީގެ އިތުރުން، ފަލަސްތީނުގެ މައްސަލަ ހައްލުވެގެން ދާނީ 1967 ވަނަ އަހަރުގެ ކުރިން ކަނޑައަޅާފައިވާ އިމުގެ ތެރޭގައި އެ ފަލަސްތީނުގެ މިނިވަން އަދި މުސްތަގިއްލު ދައުލަތެއް ގާއިމުކޮށް، އެ ގައުމުގެ ވެރި ރަށުގެ ގޮތުގައި އިރުމަތީ ގުދުސް ކަނޑައެޅުމުން ކަމަށް ސަރުކާރުން ބުނާ ބުނުން ރައީސް ތަކުރާރުކުރެއްވިއެވެ.
