އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ރާއްޖެ އަތުވެއްޖެ ނަމަ ހައްޔަރުކުރާނެ ކަމުގެ ޔަގީންކަން ހޯމްލޭންޑް ސެކިއުރިޓީ މިނިސްޓަރު އަލީ އިހުސާން ދެއްވައިފިއެވެ.
'އެކްސް'ގައި މިނިސްޓަރު ލިޔުއްވި ގޮތުގައި، ބައިނަލްއަގުވާމީ ކްރިމިނަލް ކޯޓު (އައިސީސީ)ގެ އަމުރުތައް ވަކި މީހަކު އިސްތިސްނާނުކޮށް ރާއްޖެއިން ތަންފީޒުކުރާނެއެވެ. އިއްޔެ ލިޔުއްވި ޕޯސްޓާ ގުޅިގެން ކުރިމަތިވި ބައެއް ފާޑުކިއުންތަކާ ހުރެ، މިނިސްޓަރު ވަނީ މިއަދު ހެނދުނު މި ވާހަކަ ތަކުރާރުކޮށް ދަންނަވައި އާ ޕޯސްޓެއް ލިޔުއްވައިފައެވެ.
ނަތަންޔާހޫ އާއި އިޒްރޭލުގެ ކުރީގެ ޑިފެންސް މިނިސްޓަރު ޔޯވް ގަލަންޓް ހައްޔަރުކުރުމުގެ އަމުރަކަށް މިދިޔަ މެއި މަހު އައިސީސީގެ ޕްރޮސެކިއުޓަރު ކަރީމް ޚާން އެދުނެވެ. އެއީ އިޒްރޭލުން ފަލަސްތީނުގައި ހިންގަމުންދާ ގަތުލުއާންމުތަކާ ގުޅިގެންނެވެ. އެ މައްސަލައާ ގުޅިގެން މި މަހުގެ 21 ވަނަ ދުވަހު ނަތަންޔާހޫ ގަލަންޓްގެ އިތުރުން ހަމާސްގެ އަސްކަރީ ވެރިޔާ މުހައްމަދު ޟައީފް ހައްޔަރުކުރަން އައިސީސީން އަމުރު ނެރުނެވެ.
މި އަމުރާ ގުޅިގެން އެކި ގައުމުތަކުން ވަނީ ނަތަންޔާހޫ އެ ގައުމުތަކަށް އަތުވެއްޖެ ނަމަ ހައްޔަރުކުރާނެ ކަމަށް ބުނެފައެވެ.
ދުނިއޭގެ ގައޮމު ތަކުގެ ލަފާނުހޯދާ ތިބޭފުޅުންނަށް ތިކަންކުރެވޭނެބާ؟
ކަލޭ ތިޔައީ ކާކު.