އިޒްރޭލުން ލުބުނާނަށް ދެމުން ގެންދާ ހަމަލާތަކުގައި މުގާބިލުގައި ހިޒްބުއްލޯ އިން އިޒްރޭލަށް 340 ހަމަލާއެއް ދީފިއެވެ.
އިޒްރޭލުގެ އަސްކަރީ ރޭޑިއޯ އިން ބުނީ ހިޒްބުއްލޯ އިން ހަމަލާ ދީފައިވަނީ މިސައިލާއި ޑްރޯން ބޭނުން ކޮށްގެން ކަމަށާއި ބައެއް ހަމަލާތައް ވައިގެ ތެރޭގައި ނާކާމިޔާބު ކޮށްލެވުނު ނަމަވެސް ބައެއް ހަމަލާ އަމާޒަށް ވާސިލުވެ ގެއްލުންތަކެއް ލިބިފައި ވާ ކަމަށެވެ.
އެ ގޮތުން ހަމަލާ އަމާޒުވި ތަންތަނުގެ ތެރޭގައި އިޒްރޭލުގެ އެންމެ ތަރައްގީ ހިސާބު ނުވަތަ މެދުތެރެ ކަމަށް ވާ ޕެޓާ ތިކްވާ، ނަހަރިއްޔާ އަދި ހައިފާ ހިމެނެއެވެ. ހަމަލާތަކުގައި ބޮޑެތި ގެއްލުންތަކެއް ލިބިފައި ވާ އިރު ހަމަލާގެ ޝިކާރައަކަށް ވެ 11 މީހަކު ޒަހަމްވެފައި ވެއެވެ.
ހަބަރުތައް ބުނާގޮތުން، ހިޒްބުއްލޯގެ ހަމަލާތައް އަމާޒުވެ އިޒްރޭލު ސިފައިންގެ 2 މަގާމެއްގެ އިތުރުން ރަށުތެރޭގެ ބައެއް އިމާރާތްތަކާއި ބައެއް އުޅަނދުތަކަށް ވަނީ ބޮޑެތި ގެއްލުންތަކެއް ލިބިފައެވެ.
އަތުވެދާނެ ހަމަލާއަކުން ދިފާއުވުމަށް އިޒްރޭލުން ގާއިމު ކޮށްފައި ހުންނަ 'އަޔަން ޑޯމް' އަށް ހިޒްބުއްލޯގެ ބައެއް ހަމަލާތައް މައިތިރި ނުކުރެވުނުކަމަށް ވެސް އިޒްރޭލުން ވަނީ އެއްބަސްވެފައެވެ. ހަމަލާތައް ރަށުތެރެއަށް އަމާޒުވާން ފެށުމުން، އާންމުން ފިލަން ދުވެ ވަނީ ބިންގަރާސްތަކަށާއި ހަނގުރާމައިގެ ހާލަތަށް ވިސްނައިގެން ހަދާފައި ހުރި ސޭފް ހައުސްތަކަށެވެ.
ބޭރުގެ ހަބަރުތައް ގެންނަ އަލްޖަޒީރާއިން ބުނީ، ރޭ އިޒްރޭލުގެ އުޑުމަތި ދިއްލެމުން ދިޔައީ ހިޒްބުއްލޯ އިން ފޮނުވަމުން ދިޔަ މިސައިލްތަކާއި ޑްރޯންތަކުން ކަމަށެވެ. މިސައިލްތައް ވައިގެ ތެރޭގައި ގޮވައި އޭގެ ބައެއް ބައިތައް ހުޅަނގު އައްސޭރީގެ ތުލްކަރަމަށް ވެސް ވެއްޓިފައި ވެއެވެ. އޭގެ ސަބަބުން ބައެއް އިމާރާތްތައް ހަލާކުވެ އަދި ތުލްކަރަމްގެ ރެފިއުޖީ ކޭމްޕްތަކުގައި ދިރިއުޅެ ބައެއް މީހުންނަށް އެކިވަރުގެ އަނިޔާވެފައި ވެސް ވެއެވެ.
ގާޒާގެ އިތުރުން ލުބުނާނަށް އިޒްރޭލުން ދޭ ހަމަލާތައް ވެސް ރޭ ވަނީ ވަރުގަދަ ކޮށްފައެވެ. ބޮޑެތި ގެއްލުންތައް ދެމުން މާސިންގާ ބޮޑެތި ބޮން އަޅަމުން އިޒްރޭލުން ވަނީ ލުބުނާނެ ވެރިރަށް ބެއިރޫތަށް ވެސް ހަމަލާ ދީފައެވެ. އަދި ލުބުނާނުގެ އެތަންމިތަނަށް ދެމުން ގެންދާ ހަމަލާތަކުގައި އޮޅިގެން ކަމަށް ބުނެ ލުބުނާނު ސަރުކާރު ސިފައިންގެ ފައުޖަކަށް ވެސް އިޒްރޭލުން ވަނީ ހަމަލާ ދީފައެވެ. އެ ހަމަލާގައި އެކަކު މަރުވެ 18 މީހަކު ވަނީ ޒަހަމްވެފައެވެ.
ލުބުނާނަށް އިޒްރޭލުން ދެމުން ގެންދާ ހަމަލާތަކުގައި މިހާތަނަށް 3670 މީހަކު މަރުވެ 15413 މީހަކު ޒަހަމްވެފައި ވެއެވެ.
ހިޒްބުއްލޯ ނައްތާލުމުގެ ނަމުގައި ލުބުނާނާ ދެކޮޅަށް އިޒްރޭލުން ހިންގާ އުދުވާން ހުއްޓުވުމަށް ކަމަށް ބުނެ އެމެރިކާއިން ސުލްހައިގެ މަޝްވަރާތަކެއް ވެސް ކުރިއަށް އެބަގެންދެއެވެ. އެއްވެސް ކުރިއެރުމެއް ނެތި ހިނގަމުން އަންނަ ވާހަކަތަކާ ގުޅޭ ގޮތުން އެމެރިކާގެ މަންދޫބު ވިދާޅުވަނީ، ވަރަށް އަވަހަށް އެއްބަސްވުމަކާ ހަމައަށް ވާސިލު ވެވިދާނެ ކަމަށެވެ.
އިޒްރޭލުން ގާޒާއަށް ދެމުން ގެންދާ ހަމަލާތައް ހުއްޓުވުމުމުގެ ނަމުގައި ވެސް މީގެ ކުރިން އެމެރިކާއިން ސުލްހައިގެ ވާހަކަތަކެއް ފެންމަތި ކުރިއެވެ. ހައެއްކަ މަސް ވީ އެ ވާހަކަތަކުން އަދިވެސް އަލިމަގެއް ނުފެންނަ އިރު އެމެރިކާއިން ދަނީ އިޒްރޭލުން ބޭނުންވާ ހަތިޔާރާއި އެހީތެރިކަން ފޯރުކޮށްދީ ބިލިއަން ބިލިއަން ޑޮލަރުން ފައިސާދީ ގާޒާގެ އެތަން މިތަނަށް އިޒްރޭލު ލައްވާ ހަމަލާ ދެމުންނެވެ.
ހަނގުރާމައިގެ ޖަރީމާ ހިންގާކަން ސާބިތުވެ އިޒްރޭލު ބޮޑުވަޒީރު ހައްޔަރު ކުރަން ބައިނަލްއަގުވާމީ ޖިނާއީ ކޯޓުން އަމުރު ނެރުނީމައިވެސް އެމެރިކާއިން ވަނީ އެ ހުކުމް ބަލައިނުގަންނާނެ ކަމަށް ބުނެ ގޮން ޖަހާފައެވެ. އަދި ގާޒާ ހަނގުރާމަ ހުއްޓުވުމަށް ގޮވާލައި އދ މަޖިލީހަށް ހުށަހެޅި އާ ގަރާރުވެސް އެމެރިކާއިން ވީޓޯ ކޮށް ވަނީ ބޭރު ކޮށްލާފައެވެ.
އިޒްރޭލުން ގާޒާ ފުނޑުފުނޑު ކޮށްލަމުން ދާ އިރު، މިހާރު ހިންގާ ޖަރީމާގައި ގާޒާގެ އުތުރުގައި ހުރި ކޮންމެ ގެއެއް ވަކިވަކިން ބަލައި ފާސްކޮށް މުޅި އުތުރު އެކީއެކަށް ހުސްކޮށްލުމުގެ ގަތުލުއާންމެއް ވަނީ ފަށާފައެވެ. ކާބޯތަކެއްޗާއި އަސާސީ ހުރިހާ ހިދުމަތަކުން ގާޒާގެ ރައްޔިތުން މަހުރޫމުކޮށް ގެތަކުން ނެރެލައި މަގުމަތިކޮށް، ބަޑިޖަހާ މަރާ، ބުލްޑޯޒަރުތަކުން އަރާ ޗިސްކުރަމުން ވަޅުލަމުން ގެންދާއިރު، ދުނިޔެ ވަނީ އިޒްރޭލު ހުއްޓުވުމަށް ނުކުޅެދިފައެވެ.
