އިތުބާރު ކުރެވޭ މަގާމެއްގައި ހުރެ ކުޑަކުއްޖަކަށް ޖިންސީ ގޯނާ ކުރި މައްސަލައިގައި ޖަލު ހުކުމް ތަންފީޒު ކުރަމުން ދިޔަ އުމުރުން 57 އަހަރުގެ ހާޝިމް އަބޫބަކުރު، ހއ. ހޯރަފުށީ، އަނދަލީބުގެ، ގޭބަންދަށް ބަދަލު ކުރީ އޭނާއަށް ސިއްހީގޮތުން ދިމާވި ކަމެއްގައި ދޭން ޖެހޭ ފަރުވާ ޖަލުގައި ބަހައްޓައިގެން ދެވެން ނެތުމުން ކަމަށް މޯލްޑިވްސް ކަރެކްޝަނަލް ސާވިސް އިން ބުނެފިއެވެ.
ކަރެކްޝަން އިން ބުނީ، ނޮވެމްބަރު 20، 2022 ގައި ޖަލު ހުކުމް ކުރި ހާޝިމް އައީ އެ އަހަރުއްސުރެ އުނަގަނޑުގެ މައްސަލައެއް ހުރެ އެ ވޭން ތަހައްމަލު ކުރަމުން ކަމަށެވެ. އަދި އެ ކަމަށް ފަރުވާ ކުރަމުން ދިޔަ ނަމަވެސް ސާޖަރީއެއް ކުރަން ރާއްޖެއިން ބޭރަށް ދިއުމަށް ޑޮކްޓަރުން ލަފާ ދިނުމާއެކު އޭނާއަށް ރާއްޖެއިން ބޭރަށް ބޭސް ފަރުވާ އަށް ދިއުމަށް ހުއްދަ ދިނުމުން މިއަހަރުގެ އޮގަސްޓް މަހުގެ 5 ވަނަ ދުވަހު ބޭރަށްގޮސް ފަރުވާ ހޯދުމަށްފަހު ސެޕްޓެމްބަރު މަހުގެ 16 ވަނަ ދުވަހު މާލެ އައި ކަމަށް ކަރެކްޝަންސް އިން ބުނެއެވެ.
އޭނާގެ ބަލި ހާލަތު ހުރިގޮތުން ޑޮކްޓަރުން ދީފައިވާ އިރުޝާދާ އެއްގޮތަށް ޖަލުގައި ބަހައްޓައިގެން ފަރުވާ ދެވެން ނެތް ކަމަށާއި އެހެން ކަމުން އޭނާ ވަނީ ހުކުމް ތަންފީޒު ކުރުމަށް ވަގުތީ ގޮތުން ގޭ ބަންދުގައި ބަހައްޓާފައި ކަމަށް ކަރެކްޝަން އިން ބުނެއެވެ. އަދި އޮންނަ އުސޫލާ އެއްގޮތަށް ހާޝިމްގެ ކަންތައްތައް މޮނިޓާ ކޮށް ބަލަމުން ދާ ކަމަށް ވެސް އެ ސާވިސް އިން ބުނެއެވެ.
ހާޝިމް ގޭ ބަންދަށް ދޫކޮށްލުމުން އެތައް ބަޔަކު އަންނަނީ ސޯޝަލް މީޑިއާގައި ކަންބޮޑުވުން ފާޅުކުރަމުންނެވެ. އޭނާ ދޫކޮށްލީ ކަމަށް ގިނަ ބަޔަކު ބުނަމުން އަންނަ އިރު، އެފަދަ ކުށެއް ކުރި މީހަކު ދޫކޮށްލުމަކީ ކަންބޮޑުވާ މައްސަލައެއްގެ ގޮތުގައި ގިނަ ބަޔަކު އަންނަނީ ބުނަމުންނެވެ.
އިތުބާރު ހުރި މަގާމެއްގައި ހުރެ ކުޑަކުއްޖަކަށް ޖިންސީ ގޯނާ ކުރުމުގެ ކުށް ސާބިތުވެ ހާޝިމްގެ މައްޗަށް ނޮވެމްބަރު 20، 2022 ގައި ވަނީ 12 އަހަރާއި 5 މަހާއި 18 ދުވަހުގެ ޖަލު ހުކުމެއް އިއްވާފައެވެ. އޭނާގެ ހުކުމް ތަންފީޒް ކޮށް ނިމޭނެ ތާރީހަކީ މެއި 8، 2035 އެވެ.
