އިންފޮމޭޝަން ކޮމިޝަނަރު އޮފީސް (އައިކޮމް) އިން ބަލަމުންދާ މައްސަލައެއްގައި ހައުސިން މިނިސްޓްރީން ޖަވާބުދާރީ ވުމަށް ބޭއްވި އަޑުއެހުމަށް ހާޒިރު ނުވި މައްސަލައަކީ އެތަނުގެ މުވައްޒަފެއްގެ އިހުމާލުން ވެފައިވާ ކަމެއް ކަމަށް އެ މިނިސްޓްރީން ބުނެފިއެވެ.
މި މަހުގެ 7 ވަނަ ދުވަހުގައި އައިކޮމްގައި ބޭއްވި އަޑުއެހުމަކަށް ހައުސިން މިނިސްޓްރީން ހާޒިރުވެފައި ނުވާ މައްސަލައިގައި އައިކޮމް އިން ވަނީ ހައުސިން މިނިސްޓްރީން 350 ރުފިޔާ އިން ޖޫރިމަނާ ކޮށްފައެވެ. އައިކޮމް އިން ބާއްވާ މިފަދަ އަޑުއެހުންތަކަށް ހާޒިރުވުމަށް އަންގާ ފަރާތްތަކުން އެ އަޑުއެހުމަކަށް ހާޒިރު ނުވެވޭ ނަމަ އައިކޮމް އަށް އެ އަޑުއެހުމަށް ހާޒިރުވާން ދީފައިވާ ވަގުތުގެ އެއް ގަޑިއިރު ކުރިން އަންގަން ޖެހެއެވެ. ނަމަވެސް ހައުސިން މިނިސްޓްރީން އެ އަޑުއެހުމަށް ހާޒިރުވެފައި ނުވާ އިރު، ހާޒިރު ނުވެވޭ ކަން އަންގާފައެއް ވެސް ނުވެއެވެ.
މި ކަމާ ގުޅިގެން މިއަދު ހައުސިން މިނިސްޓްރީން ނެރުނު ނޫސްބަޔާނެއްގައި ބުނީ، އެ މިނިސްޓްރީގެ ކަންކަން އެންމެ ހާމަކަން ބޮޑު ގޮތެއްގައި އަދި ޖަވާބުދާރީ ކުރުވަނިވި ގޮތެއްގައި ކުރިއަށް ގެންދިއުމަށް މައުލޫމާތު ލިބިގަތުމުގެ ހައްގުގެ ގާނޫނުގެ ދަށުން މައުލޫމާތު ހޯދުމަށް އެދި ހުށަހަޅާ ހުށަހެޅުންތަކަށް ކަނޑައެޅިފައިވާ މުއްދަތުގައި މައުލޫމާތު ފޯރުކޮށް ދިނުމަކީ ވަރަށް ބޮޑަށް އިސްކަމެއް ދޭ ކަމެއް ކަމަށެވެ.
އެގޮތުން 7 ނޮވެމްބަރުގައި އައިކޮމްއިން އެ މިނިސްޓްރީ ޖޫރިމަނާ ކުރުމަކީ އެ މިނިސްޓްރީގެ މުވައްޒަފެއްގެ އިހުމާލުން ހިނގާފައިވާ ކަމެއް ކަމަށް ހައުސިން މިނިސްޓްރީން ބުނެއެވެ. އަދި އެ މުވައްޒަފާ މެދު ސިވިލް ސާވިސް ގަވާއިދުގައިވާ ގޮތުން ފިޔަވަޅު އެޅުމުގެ ކަންކަން ކުރިއަށް ދާ ކަމަށް ހައުސިން މިނިސްޓްރީން ބުނެއެވެ.
މިފަދަ ކަންކަން ތަކުރާރު ވިޔަ ނުދިނުމައްޓަކައި ކަމާ ގުލޭ އުސޫލުތައް ހަރުދަނާ ކުރުމުގެ މަސައްކަތް ކުރަމުންދާ ކަމަށް ވެސް އެ މިނިސްޓްރީން ބުނެއެވެ.
