ތައުލީމީ ދާއިރާގެ އެކި މަޝްރޫއުތައް ކުރިއަށް ގެންދިޔުމަށްފަހު ބިލްކަށް ނުދައްކާހުރި ފައިސާގެ ތެރެއިން 34 މިލިޔަން ރުފިޔާ، ފިޔަވާ އެހެން ހުރިހާ ފައިސާއެއް ދައްކާ ހަލާސްކޮށްފައިވާކަމަށް އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ވިދާޅުވެއްޖެއެވެ.
ޕީއެސްއެމް ނިއުސްއިން ގެނެސްދިން "ހަފްތާ 52" ޕްރޮގްރާމްގައި ވާހަަކަދައްކަމުން މިނިސްޓަރު ވަނީ މި ސަރުކާރު ހަވާލުވިއިރު ތައުލީމީ ދާއިރާގެ އެކި މަޝްރޫއުތައް ކުރިއަށް ގެންދިޔުމަށްޓަކައި ކުންފުނިތަކާ ހަވާލުކުރުމަށްފަހު ފައިސާ ނުދައްކާ ހުރިކަން ފާހަގަކުރައްވާފައެވެ. އެގޮތުން ކްލާސްރޫމްތަކާއި، މަލްޓިޕާޕަސް ހޯލް އިމާރާތްކުރުންފަދަ މަޝްރޫއުތަކަށް ފައިސާ ނުދިނުމުގެ ނަތީޖާއެއްގެ ގޮތުން އެތަންތަނުގެ މަސައްކަތް ހުއްޓިފައިވާކަމަށް މިނިސްޓަރު ވިދާޅުވިއެވެ.
މިކަމާއި ގުޅޭ އިތުރު ތަފްސީލުތައް ހާމަކުރައްވަމުން މިނިސްޓަރު ވިދާޅުވީ މި ސަރުކާރުން ހަވާލުވިއިރު ތައުލީމީ ދާއިރާގެ މަޝްރޫއުތައް ކުރިއަށް ގެންދިއުމަށް ފަހު 280 މިލިޔަން ރުފިޔާގެ ބިލު ނުދައްކާ އޮތްތަކަމަށެވެ. އެހެންކަމުން އެންމެ އަވަސްވެގަތީ އެ ބިލްތައް ދައްކާ ހަލާސްކޮށް މަޝްރޫއުތައް އަވަހަށް ފެށޭނެ ގޮތެއް ހޯދުމަށްކަމަށް ވަޒީރު ވިދާޅުވިއެވެ.
މީގެ އިތުރުން މިނިސްޓަރު ވިދާޅުވީ ވޭތުވެދިޔަ 1 އަހަރުގެ ތެރޭގައި 34 މިލިޔަން ރުފިޔާ ފިޔަވާ އެހެން ހުރިހާ ފައިސާ ދައްކާ ހަލާސްކޮށްފައިވާކަމަށެވެ. އަދި މި އަހަރު ނިމުމުގެ ކުރިން ނުދެވި ހުރި ފައިސާތައް ދީ ނިންމުމަށް މަސައްކަތް ކުރަމުންދާކަމަށް މިނިސްޓަރު ވިދާޅުވިއެވެ.
2024 ވަނަ އަހަރު ބަޖެޓް އެކުލަވާލިއިރު އެކަށީގެންވާ ވަރަށް މަޝްރޫއުތަކަށް ފައިސާ ހަމަޖައްސާފައިނުވާކަން ފާހަގަކޮށް މިނިސްޓަރު ވިދާޅުވީ އައު މަޝްރޫއުއެއް ފަށްޓަށް ދައުލަތުގެ މާލިއްޔާތު ގަވައިދު ބުނާގޮތުން ބަޔަކަށް މަސައްކަތެއް ހަވާލުކޮށްފިކަމުގައި ވަނީނަމަ މަސައްކަތުގެ 15 ޕަސެންޓު ދައްކަން ޖެހެއެވެ. އެހެންނަމަވެސް ގިނަ މަޝްރޫއުތަކަށް ހިމަނާފައިވަނީ އެއަށްވުރެ މަދު ފައިސާކަމުގައި މިނިސްޓަރު ވިދާޅުވިއެވެ. އަދި މީގެ ސަބަބުން މަސައްކަތް ހަވާލުކުރިނަމަވެސް ފައިސާ ދިނުމަށް ދަތިތަކެއް ހުރިކަން މިނިސްޓަރު ވަނީ ފާހަގަކުރައްވާފައެވެ.
