ރާއްޖޭގެ ހާއްސަ އިގްތިސޯދީ ސަރަހައްދަށް އެއްވެސް ބަދަލެއް ގެނެވޭނީ އާންމުންގެ ހިޔާލު ހޯދުމުގެ ވޯޓަކަށް ގޮސްގެން ކަމަށް، މުޅި މަޖިލީހުގެ ކޮމިޓީން ނިންމައިފިއެވެ.
ގާނޫނުއަސާސީގެ ތިން ވަނަ މާއްދާގައި މިހާރު އޮންނަ ގޮތުން ރާއްޖޭގެ ސަރަހައްދަކީ ރާއްޖޭގެ އާކިޕެލަޖިކް ބޭސްލައިންތަކުގެ ތެރޭގައިވާ ބިމާއި ޖައްވާއި ކަނޑާއި ކަނޑުގެ އަޑީގައިވާ ބިމާއި އެ ބޭސްލައިންތަކުން ފެށިގެން ބޭރުގައިވާ ރާއްޖޭގެ ކަނޑާއި ކަނޑުގެ އަޑީގައިވާ ބިމާއި ކަނޑާއި ގުޅިފައިވާ ޖައްވެވެ.
ގާނޫނުގައިވާ ގޮތުން އެ ސަރަހައްދަށް ބަދަލު ގެނެވޭނީ މަޖިލީހުގެ ޖުމްލަ މެންބަރުންގެ މަދުވެގެން ތިންބައިކުޅަ ދެބައިގެ އަޣުލަބިއްޔަތުންނެވެ.
ހުޅުދޫ ދާއިރާގެ މެންބަރު މުހައްމަދު ޝާހިދު ހުށަހެޅުއްވީ، ރާއްޖޭގެ އެތެރޭގެ ކަނޑާއި އާކިޕެލަޖިކް ކަނޑާއި ސަރަހައްދީ ކަނޑާއި އެ ކަނޑާ ގުޅިފައިވާ ކަނޑާއި ރާއްޖޭގެ ހާއްސަ އިގްތިސޯދީ ސަރަހައްދަށް އެއްވެސް ބަދަލެއް ގެނެވޭނީ ނުވަތަ އުނިކަމެއް ގެނެވޭނީ މަޖިލީހުގެ ޖުމްލަ މެންބަރުންގެ މަދުވެގެން ތިންބައިކުޅަ ދެބައި އަޣުލަބިއްޔަތުން ފާސްވާ ގާނޫނަކުން ކަމަށް ހެދުމަށް އިތުރުކުރުމަށެވެ.
ބާރަށު ދާއިރާގެ މެންބަރު އިބްރާހީމް ޝުޖާއު ވަނީ ރާއްޖޭގެ އިގްތިސޯދީ ސަރަހައްދަށް އެއްވެސް ބަދަލެއް ގެނެވޭނީ މަޖިލީހުގެ ހަތަރުބައިކުޅަ ތިންބައި އަޣުލަބިއްޔަތުން ކަމަށް ކަނޑައެޅުމަށާއި، އެފަދަ ނިންމުމެއް ނިންމޭނީ އާންމުންގެ ފެންނަ ނުފެންނަ ވޯޓަކަށް ގޮސްގެން ކަމަށް ވެސް އިތުރުކުރުމަށް ހުށަހަޅުއްވައިފައެވެ.
ކޮމިޓީން ނިންމީ ޝުޖާއު ހުށަހެޅުއްވި ހުށަހެޅުއްވުންތައް ބަލައިގަތުމަށެވެ.
ރާއްޖޭގެ ދެކުނުގައި އޮންނަ ޗާގޯސް ރަށްތަކުގެ ބާރު ހިނގަނީ މޮރިޝަސް އަށް ކަމަށާއި، ޗާގޯސްގެ ކަނޑުގެ ސަރަހައްދާއި ރާއްޖޭގެ ކަނޑުގެ ފުށުއަރާ ހިސާބުގެ އިން ވަކިކުރުމަށް އެދި މޮރިޝަސް އިން އިޓްލޮސް އަށް މައްސަލަ އެއް ހުށަހެޅިއެވެ. އިޓްލޮސް އިން މިކަމުގައި މޮރިޝަސް އާ އެއްކޮޅަށް ނިންމުމުން ރާއްޖޭގެ ކަނޑުން ބައެއް ވަނީ ގެއްލިފައެވެ.
އެ ސަރަހައްދު އަނބުރާ ހޯދުމަކީ މި ސަރުކާރުގެ ވައުދުތަކުގެ ތެރެއިން ވައުދެކެވެ.
