ރައީސް ޑރ. މުހައްމަދު މުއިއްޒުގެ ހަރުދަނާ ސިޔާސަތުތަކާއެކު ރާއްޖޭގެ ބަޖެޓު ޑެފިސިޓު މިއަހަރު 378 މިލިއަން ރުފިޔާއިން ކުޑަކުރެވިފައިވާ ކަމަށް ޕީޕަލްސް ނެޝަނަލް ކޮންގްރެސް (ޕީއެންސީ) އިން ބުނެފިއެވެ.
ޕީއެންސީ އިން މިއަދު ނެރުނު ބަޔާނެއްގައި ބުނެފައިވަނީ ދައުލަތުގެ ހަރަދުތައް ކުޑަކުރުމަށް 2024 ވަނަ އަހަރު ސަރުކާރުން އެޅި ފިޔަވަޅުތަކުގެ ސަބަބުން އަހަރުން އަހަރަށް ބޮޑުވަމުން އައި ހަރަދުތައް ކޮންޓްރޯލް ކުރެވިފައިވާކަމަށާއި، އެގޮތުން ފާއިތުވި ކޮންމެ އަހަރަކު 15 އިންސައްތައިން ދައުލަތުގެ ހަރަދުތައް އިތުރުވަމުން ދިޔަ ނަމަވެސް ނިމުނު އަހަރާ އަޅާބަލާއިރު މި އަހަރު ހަރަދުތައް އިތުރުވީ އެންމެ 2.5 އިންސައްތަ ކަމަށެވެ.
މީގެއިތުރުން ހަރަދުތައް ކޮންޓްރޯލް ކުރެވުމުގެ ސަބަބުން ބަޖެޓު ޑެފިސިޓު ކޮންޓްރޯލް ކުރެވިފައިވާކަން ފާހަގަކުރަމުން ޕީއެންސީ އިން ބުނީ މި އަހަރުގެ ބަޖެޓު ޑެފިސިޓު 378 މިލިއަން ރުފިޔާއިން ކުޑަކުރެވި 3.6 އިންސައްތަ ދަށްކުރެވިފައިވާ ކަމަށެވެ.
ޕީއެންސީ އިން އިތުރަށް ބުނީ ކުރީ ސަރުކާރުން ބޭރުގެ ފަރާތްތަކުގެ މާލީ އެހީތެރިކަމުގައި ހިންގި މަޝްރޫތަކުގެ ހަރަދުތައް ރެކޯޑުނުކޮށް މި އަހަރުގެ ހަރަދުތަކުގެ ތެރެއަށް އެ ހަރަދުތައް ހިމަނަން ޖެހުމުން ކުރިމަތިވި މައްސަލަތައް ހައްލުކޮށް ކޮންމެ ހަފްތާއަކު އެއްފަހަރު ދައުލަތުގެ ހަރަދާއި އާމްދަނީގެ ތަފްސީލު މިހާރު ފިނޭންސް މިނިސްޓްރީއިން އާންމުކުރަމުން ދާކަމަށެވެ.
އަދި އާރްޓީއައި ތަކަށް ޖަވާބުދިނުމުގައި މި ސަރުކާރުން ކުރީ ސަރުކާރުން ފަދައިން އިހުމާލުވެފައި ނުވާނެކަމަށާއި، އެކަން ތަފާސްހިސާބުތަކުން ފެންނަން އޮންނާނެ ކަމަށްވެސް ޕީއެންސީ އިން ވަނީ ބުނެފައެވެ. އެގޮތުން ފާއިތުވި ސަރުކާރުން ދައުލަތުގެ ކުންފުނިތަކުން އެއްވެސް އާރުޓީއައިއަކަށް ޖަވާބު ނުދޭ ކަމަށާއި، ޖަވާބުދޭން ޖެހޭ ކަމަށް ކޯޓުތަކުން ކަނޑައެޅުމުންވެސް ޖަވާބު ނުދީ ހިފަހައްޓާފައި އޮތް ކަމަށް ޕީއެންސީ އިން ވަނީ ބުނެފައެވެ. ޕީއެންސީ އިން ބުނީ އެ ސިޔާސަތު ނިމުމަކަށް ގެންނެވީ ރައީސް މުއިއްޒު ކަމަށެޗެ.
މީގެއިތުރުން ފާއިތުވި އަހަރު ތެރޭ 70 އަށް ވުރެ ގިނަ ނޫސްވެރިންގެ ބައްދަލުވުން ބޭއްވި ކަމަށާއި، 700 އަށްވުރެ ގިނަ ފަހަރު ސަރުކާރުގެ ވަޒީރުން އެކި މީޑިއާތަކަށް މައުލޫމާތު ދެއްވި ކަމަށްވެސް ޕީއެންސީ އިން ވަނީ ބުނެފައެވެ.
