ޔޫއޭއީ އާއި ތައިލޭންޑްގެ ހޮސްޕިޓަލުތަކުން އާސަންދަ ހަމަޖެހޭ ހިސާބަށް ހިނގައްޖެ ކަމަށް، އެންސްޕާގެ ސީއީއޯ ހީނާ ވަލީދު ވިދާޅުވެއްޖެއެވެ.
ރައްޔިތުންގެ މަޖިލީހުގެ އިޖުތިމާއީ ކޮމިޓީއަށް ހާޒިރުވެވަޑައިގެން މެންބަރުންގެ ސުވާލުތަކަށް ޖަވާބު ދެއްވަމުން ހީނާ ވިދާޅުވީ، ޔޫއޭއީ އާއި ތައިލޭންޑްގެ ހޮސްޕިޓަލްތަކާ ވާހަކަ ދެކެވި ކުރިއަށްދެވޭ ހިސާބަށް ކަމަށެވެ. ނަމަވެސް އެ ތަންތަނުން އާސަންދަ ދެވޭނެ ތާރީހާއި މައުލޫމާތު ފަހުން ހާމަކުރައްވާނެ ކަމަށް ވިދާޅުވެ އިތުރު ތަފްސީލު ނުދެއްވައެވެ.
މި އަހަރުގެ ކުރީކޮޅު ޗައިނާއަށް ކުރެއްވި ދަތުރުފުޅު ނިންމަވާލެއްވުމަށް ފަހު އެއާޕޯޓަށް ވަޑައިގެން ނޫސްވެރިންނާ ބައްދަލުކުރައްވައި ރައީސް ވިދާޅުވީ، އާސަންދައިގެ ދަށުން ވަކި ގައުމަކުން ނުވަތަ މަދު ގައުމަކުން ފަރުވާ ހޯދެވޭ ގޮތަށް އޮންނަ އޮތުން ނިމުމަކަށް ގެނެސް ސަރުކާރުން ފުޅާކުރާނެ ކަމަށެވެ.
އެގޮތުން ޔޫއޭއީ އާއި ތައިލޭންޑުން އާސަންދަ ލިބޭގޮތް ހައްދަވާނެ ކަމަށް އެމަނިކުފާނު ވިދާޅުވިއެވެ.
މި ސަރުކާރުގެ ފުރަތަމަ ފޮރިން މިނިސްޓަރު އަދި މިހާރުގެ ފިނޭންސް މިނިސްޓަރު މޫސާ ޒަމީރު މިދިޔަ މާޗް މަހު ވިދާޅުވީ، އާސަންދައިގެ ހިދުމަތް ޔޫއޭއީގައި ލިބޭނެ އިންތިޒާމުތައް ހަމަޖެއްސުމުގެ މަސައްކަތް ކުރަމުންދާ ކަމަށެވެ.
