ގައުމީ އެއާލައިން ހިންގާ އައިލެންޑް އޭވިއޭޝަން ސާވިސް (އައިއޭއެސް) ގެ ޑެޕިއުޓީ މެނޭޖިން ޑިރެކްޓަރުގެ މަގާމުން އައިޝަތު ޖެނިފާ ވަކިކުރީ ގާނޫނާ ހިލާފަށް ކަމަށް ނިންމައި، އޭނާ އަށް ވަޒީފާ އަލުން ދޭން ވަޒީފާއާ ބެހޭ ޓްރައިބިއުނަލުން ކުރި ހުކުމް، އައިލެންޑް އޭވިއޭޝަނުން ހައިކޯޓުގައި އިސްތިއުނާފު ކޮށްފިއެވެ.
އައިލެންޑް އޭވިއޭޝަނުން އެ މައްސަލަ ހައިކޯޓަށް ހުށަހެޅީ މިދިޔަ ހަފްތާގައެވެ. އެހެންނަމަވެސް ކޯޓަށް އަދި އެ މައްސަލަ ބަލައި ގަނެފައެއް ނުވެއެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި، ޑިސެމްބަރު 2018ގައި އައިލެންޑް އޭވިއޭޝަންގެ ޑެޕިއުޓީ މެނޭޖިން ޑިރެކްޓަރުގެ މަގާމަށް އައްޔަންކުރި ޖެނިފާ، އެ މަގާމުން ވަކިކުރަން އެ ކުންފުނީގެ ބޯޑުން ނިންމީ މިއަހަރުގެ ޖެނުއަރީ މަހުގައެވެ.
އެ މައްސަލަ ޖެނިފާގެ ފަރާތުން ވަޒީފާއާ ބެހޭ ޓްރައިބިއުނަލަށް ހުށަހެޅުމުން، އެ ޓްރައިބިއުނަލުން އޮކްޓޯބަރު މަހު 13 ވަނަ ދުވަހު ނިންމީ ޖެނިފާ މަގާމުން ވަކިކުރީ ވަޒީފާ އިން ވަކިކުރަން ޖެހޭ ފަދަ ހާލަތެއް މެދުވެރިވެގެން ނޫން ކަމަށެވެ. އަދި އޭނާ ވަކިކުރީ މައުލޫއީ އަދުލުވެރިކަމާއި އިޖުރާއީ އަދުލުވެރިކަން ގާއިމް ކުރުމެއް ނެތި ކަމަށް ޓްރައިބިއުނަލް އިން ވަނީ ބުނެފައެވެ.
އެހެންވެ، އޭނާ އަށް އަލުން ވަޒީފާ ދިނުމަށާއި މައްސަލަ ނިމުނު މުއްދަތާ ހަމައަށް ލިބެންޖެހޭ މުސާރަ އާއި އިނާޔަތްތައް ވެސް ދޭން ޖެހޭނެ ކަމަށް އެ ނިންމުމުގައި ބުނެފައިވެއެވެ.
