ރައްޔިތުން ހުށަހަޅާފައިވާ އާރްޓީއައިތަކުގެ ތެރެއިން ގާތްގަނޑަކަށް 91 ޕަސެންޓު އާރްޓީއައި އަށް ޖަވާބުދާރީވެ ވަޑައިގެންފައި ވާކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ސަރުކާރަށް އެއް އަހަރު ފުރުން ފާހަގަކުރުމަށް "ރައްޔިތުންނާއެކު ކުރިއަށް – ހަފުތާ 52" ނަމުގައި ރޭ ޒުވާނުންގެ މަރުކަޒުގައި ކުރިއަށްދިޔަ ރަސްމިއްޔާތުގައި ރައީސް ވިދާޅުވީ ރާއްޖޭގައި ދުވަހަކުވެސް މައުލޫމާތު ހާމަނުކުރާ ވަރަށް މި ސަރުކާރުން މައުލޫމާތު ހާމަކުރަމުން ދާކަމަށް ވިދާޅުވެފައެވެ.
ރައީސް ވަނީ ދެފުށްފެންނަ ސަރުކާރެއްގެ ގޮތުގައި މި ސަރުކާރު ކުރިއަށްގެންދިއުމަށް ކުރައްވާ މަސައްކަތްތަކަށް އަލިއަޅުއްވާލައްވާފައެވެ. އެގޮތުން އެމަނިކުފާނު ވަނީ ރައްޔިތުން ހުށަހަޅާފައިވާ އާރްޓީއައި ތަކުގެ 91 ޕަސެންޓަށް ޖަވާބުދީފައިވާކަމަށާއި ހަމަ އެއާއެކު ސަރުކާރުގެ ވެބަސައިޓުގެ ނަމުގައި ވެބަސައިޓެއް ގާއިމުކުރައްވާފައި ވާނެކަމަށް ރައީސް ވިދާޅުވިއެވެ. އަދި ވަޒީރުންގެ މަޖިލީހުގެ ނިންމުންތަކަށް ހާއްސަ ވެބްސައިޓެއް ހައްދަވާފައިވާކަންވެސް އެމަނިކުފާނު ފާހަގަ ކުރެއްވިއެވެ.
މީގެ އިތުރުން ރައީސް ވިދާޅުވީ 791 ފަހަރު މިނިސްޓްރީ ތަކުންނާއި އަދި މިނިސްޓަރުން އެކި މީޑިއާތަކަށް މައުޢުލޫމާތު ދީފައި ވާކަމަށެވެ. އަދި މި ސަރުކާރުން މިހާތަނަށް 73 ނޫސްވެރިންގެ ބައްދަލުވުން ބާއްވާފައި ވާކަމުގައި އެމަނިކުފާނު ވިދާޅުވިއެވެ. އަދި ރައްޔިތުންގެ އަޑު ޕޯޓަލުންވެސް ރައްޔިތުންގެ ސުވާލުތަކަށް ޖަވާބުދާރީ ވަމުން ގެންދަވާ ކަމުގައި ރައީސް ވިދާޅުވިއެވެ.
މި ރަސްމިއްޔާތުގައި ވާހަކަފުޅު ދައްކަވަމުން ރައީސް ވަނީ ތެދު މައުލޫމާތު ނޫސްތަކުންނާއި ހަބަރު ފަތުރާ ވަސީލަތްތަކުން ފޯރުކޮށްދިނުމަށް ބާރުއަޅުއްވާފައެވެ. އަދި ސަރުކާރުން މީޑިއާތައް މިނިވަންކަމާއެކު ކުރިއަށް ގެންދިއުމަށް އެހީތެރިކަން ފޯރުކޮށްދިނުމަށް ކުރައްވާ މަސައްކަތްތަކަށް މި ރަސްމިއްޔާތުގައި އެމަނިކުފާނު އަލިޅުއްވާލެއްވިއެވެ.
