ދައުލަތުގެ މަގާމަކުން ވަކިވާ ފަހުން ވެސް އެފަދަ މަގާމެއްގައި ހުރެ ހޯދި ނުހައްގު މުއްސަނދިކަމަށް ފަސޭހައިން ދައުވާކުރެވޭނެ ފަދަ ގޮތަކަށް ގާނޫނުލްއުގޫބާތު އިސްލާހުކުރަން ރައްޔިތުންގެ މަޖިލީހަށް ހުށަހެޅި އިސްލާހަށް އާންމުންގެ ހިޔާލު ހޯދަން ހުޅުވާލައިފިއެވެ.
ގާނޫނުލްއުގޫބާތު އިސްލާހުކުރުމަށް ހުށަހެޅި މި ބިލު ބަލައިގެންފައި މިދިޔަ ބުދަ ދުވަހު ބޭއްވި ރައްޔިތުންގެ މަޖިލީހުގައި ނެގި ވޯޓުގައި ބައިވެރިވި 70 މެންބަރުންގެ އަގުލައްބިއްޔަތާއެކުގައެވެ. އެހެންކަމުން ސަރުކާރުން ހުށަހެޅި މި ބިލު މަޖިލީހުގެ ރިޔާސަތުން ވަނީ އިތުރަށް ދިރާސާކުރުމަށްޓަކައި ޖުޑީޝަރީ ކޮމިޓީއަށް ފޮނުވައިފައެވެ.
ރައްޔިތުންގެ މަޖިލީހުން މިއަދު ކުރި އިއުލާނެއްގައި ބުނީ، ދިވެހިރާއްޖޭގެ ގާނޫނުލްއުގޫބާތަށް އިސްލާހު ގެނައުމުގެ ބިލަށް އާންމުންގެ ހިޔާލު ހޯދުމަށް މިއަދުން ފެށިގެން އަންނަ ބުރާސްފަތި ދުވަހުގެ މެންދުރުފަހު 12 ޖެހުމާ ހަމައަށް ފުރުސަތު ހުޅުވާލާފައިވާ ކަމަށެވެ.
މަޖިލީހުގެ އިދާރާ އިން ބުނީ، އެ ބިލަށް ހިޔާލެއް އޮތް ނަމަ މަޖިލީހުގެ އިދާރާ އަށް ލިއުމުން، ނުވަތަ ޖުޑީޝަރީ ކޮމިޓީގެ އީމެއިލަށް ފޮނުވޭނެ ކަމަށެވެ.
ސަރުކާރުގެ ފަރާތުން ގާނޫނުލްއުގޫބާތަށް ހުށަހެޅި މި އިސްލާހުގެ ބޭނުމަކީ ނުހައްގު މުއްސަނދިކަން ހޯދައި ލިބިގަތުމުގެ ކުށް ކަނޑައަޅާފައި އޮތްގޮތުން ގާނޫނު މާނަކުރުމުގައި އޮޅުން އަރާތީ ގާނޫނު އިސްލާހުކުރުމަށެވެ.
މި އިސްލާހުގައި މައިގަނޑު ގޮތެއްގައި ހުށަހަޅާފައި ވަނީ ކުދިކުދި ބަދަލުތަކެވެ. މައިގަނޑު އިސްލާހަކީ 'ދައުލަތުގެ މުވައްޒަފެއްގެ ގޮތުގައި ވަޒީފާ އަދާކުރިއިރު' އިތުރުކުރުމަށް ހުށަހެޅި ހުށަހެޅުމެވެ. އަދި ކަނޑައަޅާފައިވާ ކުށްތަކަށް ބަދަލެއް ނުގެނައި ނަމަވެސް، އިސްލާހުގައި ވަނީ ކުށްތައް އިތުރަށް ސާފުވާނެ ހެން ބައެއް ބަސް ބަހަށް ބަދަލު ގެނެސްފައެވެ.
އެކަމަކު މި އިސްލާހަށް ވަނީ، ދައުލަތުގެ މުވައްޒަފެއްގެ ދިރިއުޅުމުގެ ފެންވަރު އޭނާ ގާއިމްކޮށް ހިފަހައްޓާފައި ވަނީ ގާނޫނީގޮތުން ހުއްދަކޮށްފައިވާ ގޮތުގެ މަތިން ކަމަށްވާ ނަމަ، ނުވަތަ އޭނާގެ އާއިލީ ނުވަތަ ޒާތީ ނުވަތަ ވިޔަފާރީގެ ގުޅުމެއް އޮތް މީހަކަށް އެ މުދަލެއް ނުވަތަ ފައިސާ ލިބިފައިވަނީ ގާނޫނު ހުއްދަކުރާ ގޮތުގެ މަތިން ކަމަށްވާ ނަމަ، އެ ކުރަނީ ކުށެއްނޫން ކަން ބަޔާންކޮށް، އަކުރެއް އިތުރުކުރުމަށް ހުށަހަޅައިފައެވެ.
ނުހައްގު މުއްސަނދިކަން ހޯދުން ޖިނާއީ ކުށަކަށް ހަދަން ގާނޫނުލްއުގޫބާތަށް ފުރަތަމަ އިސްލާހެއް ގެނައީ 2021 ވަނަ އަހަރުގައެވެ. އަދި ދައުލަތުގެ އިދާރާތަކުގެ ކޮރަޕްޝަނާއި ނުހައްގު މުއްސަނދިކަން ތަހްގީގުކުރުމަށް ހުރި ގޮންޖެހުންތައް ނައްތާލުމަށްޓަކައި ގާނޫނުލްއުގޫބާތު އިސްލާހުކުރަން ހުށަހަޅުއްވާނެ ކަން ރައީސް ޑރ. މުހައްމަދު މުއިއްޒު އިއުލާނުކުރެއްވިއެވެ.
