ރާއްޖޭގެ ރައީސުލްޖުމްހުރިއްޔާ ޑރ. މުހއްމަދު މުއިއްޒުގެ ސިޔާސަތުތައް ދުނިޔޭންވެސް ބަލައިގަނެފައި ވާކަމަށް ނައިބު ރައީސް ހުސައިން މުހައްމަދު ލަތީފު ވިދާޅުވެއްޖެއެވެ.
ޕީއެސްއެމް ނިއުސްގެ "ހަފްތާ 52" ލައިވް ކަވަރޭޖުގައި ވާހަކަފުޅުދައްކަވަމުން ނައިބު ރައީސް ވިދާޅުވީ ސަރުކާރުގެ ހުރިހާ މަސައްކަތްތަކެއްވެސް ބައްޓަންކުރެވިފައިވަނީ ރައްޔިތުންގެ ލާބަޔާ މަންފާއަށްކަމަށެވެ.
ސަރުކާރުން ވެރިކަމާއި ހަވާލުވީއިރު، ރާއްޖެ އޮތް ހާލަތުން އަރައިގަތުމަށް ކޮށްފައިވާ މަސައްކަތްތަކުގެ ތަފްސީލްތައް ހިއްސާކުރައްވަމުން ނައިބު ރައީސް ވިދާޅުވީ ސަރުކާރުން ވެރިކަމާއި ހަވާލުވީއިރު އޮތް އެންމެ ބޮޑު ގޮންޖެހުމަކީ ދައުލަތުގެ ހިންގުމަށް ދަތިވާ މިންވަރަށް ދަރަނި ނަގާފައި އޮތުން ކަމަށެވެ. އެހެންނަމަވެސް މިކަމުގައި ސަރުކާރުން ކުރިއެރުންތައް ހޯދާފައިވާކަމަށް ނައިބު ރައީސް ވިދާޅުވިއެވެ. އަދި މިކަމުގައި ސަރުކާރުން މަސައްކަތްކުރަމުންދަނީ ގައުމުތަކާ ގާތްގުޅުމެއް ބާއްވައިގެންކަމަށް ނައިބު ރައީސް ވިދާޅުވިއެވެ.
މީގެ އިތުރުން ނައިބު ރައީސް ވިދާޅުވީ ދަރަނި ދައްކަންހުރި ގައުމުތަކާއެކު ގުޅުންތައް ބަދަހިކުރެވިއްޖެ ކަމަށާއި ހާރިޖީ ސިޔާސަތުގެ ތެރެއިން ވަރަށް ބޮޑެތި ލުއިތަކެއް ލިބެމުން އަންނަކަމަށެވެ. އަދި މި ކާމިޔާބީތައް ލިބެމުންދަނީ މި ސަރުކާރުގެ ހާރިޖީ ސިޔާސަތުތަކުންކަމަށާއި ދުނިޔެއިންވެސް ރައީސްގެ ސިޔާސަތުތައް ބަލައިގެންފައިވާ ކަމަށެވެ.
ކުރިއަށް އޮތް ދުވަސްތަކުގައި ގިނަ މަޝްރޫއުތަކެއް ފެށިގެންދާނެކަން ފާހަގަކުރައްވަމުން ނައިބު ރައީސް ވިދާޅުވީ ސަރުކާރުން މަސައްކަތްކުރަމުންދަނީ އިޖުތިމާއީގޮތުން ރާއްޖޭގައި ހުރި ބޮޑެތި މައްސަލަތަކަށްވެސް ދާއިމީ ހައްލުތަކެއް ހޯދައިދިނުމަށް ކަމަށެވެ. އެގޮތުން މިހާރު ސަރުކާރުން މިގެންނަ ބަދަލުތަކާއެކު ގައުމުގެ މިސްރާބު ހުރީ އެމަގުން ކަން ނައިބު ރައީސް ފާހަގަކުރެއްވިއެވެ.
