ދިވެހިރާއްޖެއާއި އަޒަރުބައިޖާންއާ ދެމެދު މުހިއްމު ދެ އެއްބަސްވުމެއްގައި ސޮއިކޮށް، ދެ ގައުމުގެ ގުޅުން އިތުރަށް ފުޅާކުރުމަށް ފޮރިން މިނިސްޓަރު ޑރ. އަބްދުﷲ ހަލީލު މަޝްވަރާ ކުރައްވައިފިއެވެ.
މިނިސްޓަރު ހަލީލް މިއަދު އަޒަރުބައިޖާންގެ ފޮރިން މިނިސްޓަރު ޖޭހުން ބައިރަމޯވް އާ ވަނީ ބައްދަލުކުރައްވައި ދިިވެހިރާއްޖެ އާއި އަޒަރުބައިޖާންއާ ދެެމެދު އޮތް ގާތް ގުޅުން އިތުރަށް ފުޅާކުރުމަށް މަޝްވަރާ ކުރައްވާފައެވެ. އަޒަރުބައިޖާންގެ ވެރިރަށް ބާކޫ ގައި ކުރިއަށްދާ ކޮންފެރެންސް އޮފް ދަ ޕާޓީސް އޮފް ދަ ޔޫއެންއެފްސީސީސީގެ ހަވާސާގައި ބޭއްވި މިބައްދަލުވުމަށްފަހު މުހިއްމު ދެ އެއްބަސްވުމެއްގައި ދެގައުމުން ވަނީ ސޮއިކޮށްފައެވެ.
ފޮރިން މިނިސްޓްރީން ބުނީ، މިއަދު ސޮއިކުރި "އެގްރީމެންޓް އޮން މިއުޗުއަލް އެގްޒެމްޕްޝަން އޮފް ވިސާ ރިކުއަމަންޓް ފޯ ހޯލްޑާސް އޮފް ޑިޕްލޮމެޓިކް، ސާވިސް އެންޑް އޮފިޝަލް ޕާސްޕޯޓްސް ބިޓްވީން ދަ ގަވަމަންޓް އޮފް މޯލްޑިވްސް އެންޑް ދަ ގަވަމަންޓް އޮފް އަޒަރުބައިޖާން" އެއްބަސްވުމަކީ ދެ ގައުމުގެ ރައްޔިތުންނަށް ދަތުރުފަތުރުކުރުމުގައި ލުއިފަސޭހަ ގޮތްތަކެއް ހޯދައިދިނުމުގެ މަގްސަދުގައި ސޮއިކުރި އެެއްބަސްވުމެއް ކަމަށެވެ. މި އެއްބަސްވުމުގެ ސަބަބުން ދިވެހިރާއްޖޭގެ ޑިޕްލޮމެޓިކް އަދި އޮފިޝަލް ޕާސްޕޯޓް ބޭނުންކުރާ ފަރާތްތަކަށް ވިސާ އާއި ނުލައި އަޒަރުބައިޖާން އެތެރެވުމާއި، ޓްރާންސިޓް ވުން އަދި 90 ދުވަހުގެ މުއްދަތަކަށް އެގައުމުގައި ހުރުމުގެ ހުއްދަ ލިބިގެންދާނެއެވެ.
މި އެއްބަސްވުމަކީ ހުރިހާ ދިވެހިރައްޔިތުންނަށް ވިސާއަކާ ނުލައި ދަތުރުކުރެވޭނެ ގޮތް މަގުފަހިކޮށްދިނުމަށްޓަކައި ކުރާ މަސައްކަތަށް އެޅުނު މުހިއްމު ފިޔަވަޅެއް ކަމަށް ފޮރިން މިނިސްތްރީން ބުނެއެވެ. އެގޮތުން މިކަމާގުޅޭ މަޝްވަރާތައް ކުރިއަށްގެން ދިއުމަށް ވެސް ވަނީ އެއްބަސްވެފައެވެ.
މީގެއިތުރުން، މިއަދު ސޮއި ކުރި "މެމޮރަންޑަމް އޮފް އަންޑަސްޓޭންޑިން (އެމްއޯޔޫ) އޮން ކޯޕަރޭޝަން އިން ދަ ފީލްޑް އޮފް ޓުއަރިޒަމް ބިޓްވީން ދަ ގަވަމަންޓް އޮފް ދަ މޯލްޑިވްސް އެންޑް ދަ ގަވަމަންޓް އޮފް އަޒަރުބައިޖާން" އަކީ އިގްތިސީދީ، ސަގާފީ އަދި އިޖްތިމާއީ ގޮތުން ދެ ގައުމަށް ވެސް ފައިދާވާނޭ ގޮތަށް ފަތުރުވެރިކަން ކުރިއެރުވުމަށް ވެފައިވާ އެއްބަސްވުމެއް ކަމަށް ފޮރިން މިނިސްޓްރީން ބުނެއެވެ.
އަޒަރުބައިޖާނުގެ ފޮރިން މިނިސްޓަރާއެކު ބޭއްވި ބައްދަލުވުމުގައި މިނިސްޓަރު ހަލީލް ވިދާޅުވީ، ދިވެހިރާއްޖެ އާއި އަޒަރުބައިޖާންއާ ދެމެދު އޮންނަ ގާތް ގުޅުމުގެ މުހިންމު ކަމާއި، ސޮއިކުރި އެއްބަސްވުންތަކުގެ ސަބަބުން މި ގުޅުން އިތުރަށް ބަދަހިވެގެންދާނެ ކަމަށެވެ. ދެ ގައުމުގެ ރައްޔިތުންގެ ދެމެދުގައި އޮންނަ ގުޅުން އިތުރަށް ވަރުގަދަވެ ސަގާފީ ގުޅުންތަކުގެ އިތުރުން ވިޔަފާރީގެ ގުޅުންތައް ބަދަހިވެގެންދާނެކަމަށް އުއްމީދުކުރައްވާކަަމަށް ވެސް ވިދާޅުވިއެވެ. މީގެ އިތުރުން ބައިނަލްއަގްވާމީ މަސްރަހުގައި ވެސް ދެ ގައުމަށް ފައިދާވަނިވި މައްސަލަތަކުގައި ދިވެހިރާއްޖެއިން އަޒަރުބައިޖާންއާއެކު ގާތުން މަސައްކަތް ކުރާނެ ކަމަށް ވިދާޅުވެފައިވެއެވެ.
