ރާއްޖޭގައި ހިންގާ ނޫސްތަކާއި މީޑިއާތައް ކޮންޓްރޯލް ކުރުމަކީ ގަބޫލުފުޅު ކުރައްވާ ހަމައެއް ނޫން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މިހެން ވިދާޅުވެފައި މި ވަނީ، މީޑީއާތައް ރެގިއުލޭޓް ކުރުމަށް މިހާރު އޮތް މޯލްޑިވްސް މީޑިއާ ކައުންސިލް (އެމްއެމްސީ) އާއި ބްރޯޑްކާސްޓިން ކޮމިޝަން (ބްރޯޑްކޮމް) އެއްކޮށްލަން ރައްޔިތުންގެ މަޖިލީހަށް ހުށަހަޅާފައިވާ ބިލުގައި ހުރި ބައެއް ކަންކަމާ މެދު ގިނަ ފަރާތްތަކުން ކަންބޮޑުވުން ފާޅުކުރަމުންދާ ދަނޑިވަޅެއްގައެވެ.
ރައީސް މުއިއްޒު އެކްސްގައި ކުރެއްވި ޕޯސްޓެއްގައި މީޑިއާތައް ކޮންޓްރޯލް ކުރުމަކީ ގަބޫލު ކުރާ ހަމައެއް ނޫން ކަން ފާހަގަ ކުރައްވަމުން ވިދާޅުވީ، މާތްވެގެންވާ އިސްލާމް ދީނާއި ރާއްޖޭގެ ގާނޫނު އަސާސީއާ ހިލާފްނުވާހާ ހިނދަކު ދިވެހި ދައުލަތުގެ ސިޔާދަތީ ބާރު ހިންގާ ސަރަހައްދުގައި ކޮންމެ ދިވެއްސަކަށް ވެސް އެމީހެއްގެ މިނިވަންކަމާ އެކި އެމީހަކު ބޭނުން ކަމެއް ކޮށްގެން އުޅުމުގެ ހައްގު އޮންނާނެ ކަމަށެވެ.
މިއަދުގެ މަޖިލިސް ޖަލްސާއަށް މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ބިލު ހުށަހެޅުއްވީ، ސަރުކާރުގެ ކަންކަމަށް ތާއީދު ކުރައްވަމުން ގެންދަވާ ނަމަވެސް ވަކި ޕާޓީއަކަށް ނިސްބަތްވެވަޑައިނުގަންނަވާ ތުޅާދޫ ދާއިރާގެ މެންބަރު އަބްދުލްހައްނާނެވެ.
އެ ބިލުގައިވާ ގޮތުން، ބިލު ގާނޫނަކަށްވެ، އަމަލު ކުރަން ފެށުމާ އެކު އެމްއެމްސީ އާއި ބްރޯޑްކޮމްގެ މަސްއޫލިއްޔަތުތައް އަދާ ކުރުމަށް މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން އުފެދޭނެއެވެ. މި ކޮމިޝަން އެކުލެވިގެން ވަނީ ހަތް މެންބަރުންގެ މައްޗަށް ކަމަށާއި އެއީ ރައްޔިތުންގެ މަޖިލީހުގެ ރުހުން ލިބިގެން ރައީސް އައްޔަން ކުރައްވާ ހަތަރު މެންބަރުންނާއި، މީޑިއާތަކުން އިންތިހާބު ކުރާ ތިން މެންބަރުންކަމަށް ބިލުގައި ބުނެފައި ވެއެވެ. ހަމައެއާއެކު އެ ކޮމިޝަންގެ ރައީސް އާއި ނައިބު ރައީސް އައްޔަން ކުރުމުގެ ބާރު ވެސް ދީފައި ވަނީ ރައީސަށެވެ. ރައީސް އެ ދެ މަގާމަށް ބޭފުޅުން ހަމަޖައްސަން ޖެހެނީ ކޮމިޝަންގެ މެންބަރުންގެ ތެރެއިން، މަޖިލީހުގެ ރުހުމާ އެކުއެވެ.
ބްރޯޑްކާސްޓް ކުރުމުގެ ހިދުމަތް ދިނުމުގެ ލައިސެންސް ލިބިފައިވާ ފަރާތްތަކާއި ނޫސްތަކުން ކޮމިޝަނުން ކަނޑައަޅާ ސުލޫކީ މިންގަނޑަކާ ހިލާފުވެއްޖެ ނަމަ އެޅޭނެ ފިޔަވަޅުތައް ވެސް ބިލުގައި ބަޔާންކޮށްފައި ވެއެވެ. އޭގެ ތެރޭގައި ތަކުރާރުކޮށް ގާނޫނާއި ގަވައިދާ ހިލާފުވަމުންދާ ނަމަ، ދޫކޮށްފައިވާ ބްރޯޑްކާސްޓިން ލައިސެންސް ނުވަތަ ނޫސްމަޖައްލާއެއް ނަމަ ދޫކޮށްފައިވާ ރަޖިސްޓްރީ ބާތިލުކުރުމަށް ކޯޓަށް ހުށަހެޅުމަށް ފަހު، ކޯޓުން ނިންމާ ގޮތެއްގެ މަތިން ލައިސެންސް ނުވަތަ ރަޖިސްޓްރީ ބާތިލުކުރެވޭނެއެވެ.
ހަމައެއާއެކު ގާނޫނާއި ގަވާއިދު އަދި ސުލޫކީ މިންގަނޑާ ތަކުރާރުކޮށް ހިލާފުވާ ބްރޯޑްކާސްޓަރުން ވޭތުވެދިޔަ އަހަރު އެ ފަރާތަކަށް ލިބުނު އާމްދަނީގެ 10 ޕަސެންޓަށް ވުރެ ބޮޑު ނޫން އަދަދަކުން ޖޫރިމަނާ ކުރުމާއި ގާނޫނާއި ގަވާއިދު އަދި ސުލޫކީ މިންގަނޑާ ތަކުރާރުކޮށް ހިލާފުވެގެން ނޫސްތައް ޖޫރިމަނާ ކުރަނީ 5،00 ރުފިޔާ އާއި 50،000 ރުފިޔާއާ ދެމެދުގެ އަދަދަކުން ކަމަށް ވެސް އެ ބިލުގައި ބަޔާން ކޮށްފައި ވެއެވެ.
މި ބިލާ ގުޅޭ ގޮތުން އެތައް ބައެއްގެ ފާޑުކިޔުން އަމާޒުވެފައިާ މި ދަނޑިވަޅުގައި އިންފޮމޭޝަން އެންޑް އާޓްސް މިނިސްޓަރު އިބްރާހިމް ވަހީދު (އަސްވާޑު) މިއަދު ވިދާޅުވެފައި ވަނީ، އެ ބިލުގައި ހިމޏާފައިވާ ކަންކަމަކީ އެ ބިލު ހުށަހެޅުއްވި މެންބަރުގެ ހިޔާލު ކަމަށެވެ. އަދި ސަރުކާރުން އަންނަނީ އަންނަނީ އެކަންކަމާ މެދު ދިރާސާ ކުރަމުން ކަމަށް މިނިސްޓަރު ވަނީ ވިދާޅުވެފައެވެ.
