ދިރާސީ އާ އަހަރަށް މާލެ ސުކޫލުތަކަށް ފޯމު ހުށަހަޅަން ބާކީ 3 ދުވަހަށް ވެފައިވާ ކަމަށް އެޑިއުކޭޝަން މިނިސްޓްރީ އިން ބުނެފިއެވެ.
އެޑިއުކޭޝަން މިނިސްޓްރީ އިން ބުނީ މި ފެށޭ 2025 ވަނަ އަހަރުގެ ދިރާސީ އާ އަހަރަށް މާލޭގެ ސަރުކާރު ސުކޫލުތަކަށް ދަރިވަރުން ވެއްދުމަށް ފޯމު ހުށަހެޅުމުގެ ސުންގަޑިއަކީ ނޮވެމްބަރު 15 ކަމަށެވެ. އެހެންކަމުން އެންމެ ފަހު ވަގުތައް މަޑުނުކުރައްވާ ވީހާވެސް އަވަހަށް ފޯމު ހުށަހެޅުމަށް މިނިސްޓްރީ އިން ވަނީ އިލްތިމާސްކުރައްވާފައެވެ.
މީގެއިތުރުން އެ މިނިސްޓްރީ އިން ބުނީ ފޯމު ހުށަހަޅަން ހުޅުވާލާފައިވާ މި މުއްދަތުގައި ގިނަ އަދަދެއްގެ ފޯމުތަކެއް އެ މިނިސްޓްރީ އަށް ލިބިފައިވާކަމަށާއި، ނަމަވެސް މަދު އަދަދެއްގެ ދަރިވަރުންގެ އެޕްލިކޭޝަން ފޯމު އަދިވެސް ލިބިފައިނުވާ ކަމަށެވެ.
އެޑިއުކޭޝަން މިނިސްޓްރީ އިން ބުނީ ފޯމު ހުށަހެޅުމުގެ ދެވަނަ ފުރުސަތަކަށް ހުޅުވާލަން ޖެހިއްޖެ ނަމަ، އެ ފުރުސަތު ދެވޭނީ ފޯމު ހުށަހެޅި ކުދިންނަށް ޖާގަ ދިނުމަށްފަހު ކަމަށާއި، މި ހާލަތުގައި އެ ކުދިންނާ އެއް އާއިލާއެއްގެ ކުދިން އުޅޭ ސުކޫލުތަކުން ޖާގަ ނުލިބުމުގެ ފުރުސަތު ބޮޑުވާނެ ކަމަށެވެ.
އެޑިއުކޭޝަން މިނިސްޓްރީ އިން ފާހަގަކުރި ގޮތުގައި 2024 ވަނަ އަހަރު މާލޭގެ ސުކޫލުތަކަށް ވަނުމަށް އެދި 4000 ވުރެ ގިނަ ފޯމު ވަނީ ހުށަހަޅާފައެވެ.
ދިރާސީ އަހަރު ބޮޑު ޗުއްޓީއަށްވެސް ވަނީ ބޮޑު ބަދަލެއް ގެނެސްފައެވެ. އެގޮތުން 2024 ގެ ދިރާސީ އާ އަހަރުގެ ކިޔެވުން ޖޫން މަހު 26 ގައި ފަށާފައިވާއިރު، ކިޔެވުން ނިމޭނީ އަންނަ އަހަރު މާޗުގައެވެ. އަދި 2024ގެ ދިރާސީ އާ އަހަރުގެ ބޮޑު ޗުއްޓީ ރޯދަމަހަށް ލިބޭ ގޮތަށް އެކެޑަމިކް ކަލަންޑަރަށްވެސް ވަނީ ބަދަލު ގެނެސްފައެވެ.
އެޑިއުކޭޝަން މިނިސްޓްރީން ސްކޫލުތަކަށް ފޮނުވި ފައިނަލް ކަލަންޑަރުގައި ރޯދަ މަސް ފެށޭ ދުވަހެއް ކަމަށް އޮތީ ފެބްރުއަރީ 28 އެވެ. ރޯދަ މަހުގެ ފަހު 10 ބަންދުވާ ގޮތަށް އޮތް އިރު ދަރިވަރުންނަށް ބޮޑު ޗުއްޓީ ދީފައި ވަނީ ވެސް އެ ދުވަސްތައް ބޮޑު ޗުއްޓީއަށް ވަންނަ ގޮތަށެވެ.
