އަންނަ ހުކުރު ދުވަހުން ފެށިގެން ރާއްޖޭގައި އީ-ސިނގިރޭޓާއި ވޭޕުގެ އެންމެހާ ވިޔަފާރިތައް މަނާކުރުމަށް ސަރުކާރުން ހުށަހެޅި ގޮތަށް ރައްޔިތުންގެ މަޖިލީހުން ފާސްކޮށްފިއެވެ.
ރައްޔިތުންގެ މަޖިލީހަށް ސަރުކާރުގެ ފަރާތުން ހެންވޭރު އުތުރު ދާއިރާގެ މެންބަރު އަހްމަދު އައިފާން ހުށަހެޅުއްވި އިސްލާހު ދިރާސާކުރި އިޖުތިމާއީ ކޮމިޓީން ފުރަތަމަ ނިންމީ، ވޭޕް މަނާކުރުމަށް ސަރުކާރުން ނިންމި މުއްދަތުގައި އިސްލާހު ދިރާސާކޮށް ނިންމުމަށެވެ. އެކަމަކު އެ އިސްލާހު އަވަސް އަރުވާލައިގެން ފާސްނުކުރުމަށް ވެސް ކޮމިޓީން ނިންމިއެވެ.
ނަމަވެސް އޭގެ ފަހުން ކޮމިޓީން ނިންމީ ސަރުކާރުން ފޮނުވި މައިގަނޑު އިސްލާހުތަކާ އެކު ކުދި އިސްލާހުތައް ގެނެސް އިސްލާހު ފާސްކުރުމަށެވެ. އެގޮތުން ކޮމިޓީން ގެނައި އިސްލާހުތަކަކީ:
- މި ގާނޫނުގެ ދަށުން ހަދާ ގަވައިދެއްގެ ތެރެއިން ދައުލަތުގެ އޮފީސްތައް ހިންގާ އިމާރާތްތަކާއި އެ ތަންތަނުގެ ގޯތިތެރޭގަައި ދުންފަތުގެ އިސްތިއުމާލު ކުރެވޭނެ ފުރުސަތު ދިނުން، މިހާރު އޮތީ ދައުލަތުގެ އޮފީސްތައް ހިންގާ އިމާރާތްތަކާއި އެ ތަންތަނުގެ ގޯތިތެރޭ ދުންފަތުގެ އިސްތިއުމާލު ނުކުރެވޭ ގޮތަށް
- ރާއްޖެއަށް އެތެރެކުރުން މަނާކުރާ ދުންފަތުގެ ބާވަތްތަކުގެ ތެރޭގައި ދުންފަތުން ދުރުހެލިވުމަށް ދެވޭ ފަރުވާގެ ތެރެއިން ހުއްދަކުރާ ބާވަތްތަކަށް އިސްތިސްނާ ދިނުން
މި އިސްލާހު ފާސްކުރުމަށް މަޖިލީހުގެ މިއަދުގެ ޖަލްސާގައި ވޯޓަށް އެހުމުން އިސްލާހު ފާސްކުރަން ފެންނަ ކަމަށް 54 މެންބަރަކު ވޯޓުދެއްވި އިރު، ބިލު ދިރާސާކުރި އިޖުތިމާއީ ކޮމިޓީގައި އިންނަވާ އައްޑޫ މީދޫ ދާއިރާގެ މެންބަރު އަބްދުއްރަހްމާނާއި ޖަލްސާ އަށް ހާޒިރުވެވަޑައިގެންނެވި އެމްޑީޕީގެ ހަތް މެންބަރުން ނިންމެވީ ވަކިކޮޅަކަށް ވޯޓު ނުދިނުމަށެވެ. އަބްދުއްރަހްމާނާއި އެމްޑީޕީގެ މެންބަރުންގެ މައިގަނޑު ކަންބޮޑުވުމަކީ އަވަސް އަރުވާލައިގެން ދޭން ޖެހޭ ވަގުތު ނުދީ މަޖިލީހުން މި އިސްލާހު ފާސްކުރަން މަސައްކަތްކުރުމެވެ.
މި އިސްލާހުގައިވާ ގޮތުން، ދުންފަތުގެ ބާވަތެއް ގަންނަ މީހަކީ 21 އަހަރު ފުރިފައިވާ މީހެއްކަން ޔަގީންކުރުމަކީ އެފަދަ ބާވަތެއް ވިއްކާ ފަރާތުގެ ޒިންމާއެކެވެ. އަދި އެފަދަ ބާވަތެއް ގަންނަ މީހަކީ ނުވަތަ ކުއްޖަކީ 21 އަހަރު ފުރިފައިނުވާ މީހެއް ނުވަތަ ކުއްޖެއް ކަމަށް ބެލެވޭނަމަ އުމުރު ޔަގީންކުރުމަށްޓަކައި އައިޑީކާޑު ނުވަތަ ސައްހަ ރަސްމީ ލިޔުމެއް ދެއްކުމަށް ވިޔަފާރިތަކުން އަންގަން ޖެހޭނެ ކަމަށް މި އިސްލާހުގައި ބަޔާންކޮށްފައިވެއެވެ.
ހަމަ އެހެންމެ ދުންފަތުގެ ބާވަތްތަކުގެ ވިޔަފާރިކުރާ ތަންތަނުން، 21 އަހަރުން ދަށުގެ މީހުންނާއި ކުޑަކުދިންނަށް ވިއްކުން ގާނޫނުގައި މަނާކަމެއްކަން އަންގައިދޭ ލިޔުމެއް ހަރުކުރުމަށް މި އިސްލާހުގައި މަޖުބޫރުކުރެއެވެ
އަދި މި އިސްލާހު ގާނޫނަކަށް ވެއްޖެ ނަމަ:
- ދުންފަތުގެ ބާވަތްތައް ވިއްކާ ތަންތަނުގައި އެފަދަ އެއްވެސް އެއްޗެއް އާންމުންނަށް ފެންނަ ގޮތަށް ބެހެއްޓުމާއި އިޝްތިހާރުކުރުން މަނާވާނެ
- ދުންފަތުގެ ބާވަތްތަކުން ވިޔަފާރިކުރާ ފަރާތްތަކަށް ކަމާބެހޭ މިނިސްޓްރީން ދޫކުރާ ސައްހަ ލައިސަންސެއް ނެގުން ލާޒިމްވާނެ
- ދުންފަތުގެ ހުއްދަނޫން ބާވަތަކުން މުއާމަލާތްކޮށްފިނަމަ 500 ރުފިޔާ އާއި 100،000 ރުފިޔާއިން ކުރާ ޖޫރިމަނާ 1،000 ރުފިޔާ އާއި 1 މިލިއަން ރުފިޔާ އާ ދެމެދުގެ އަދަދަކަށް އިތުރުވެގެން ދާނެ
- އީ-ސިނގިރޭޓާއި ވޭޕްގެ އާލާތްތަކާއި އުފެއްދުންތައް އެތެރެކޮށް ވިއްކުމާއި ހިލޭ ބެހުމާއި ބޭނުންކުރުން މަނާ ވާނެ
- އީ-ސިނގިރެޓާއި ވޭޕްގެ އާލާތްތަކާއި އުފެއްދުންތައް ވިއްކާ ފަރާތެއް 20 ހާސް ރުފިޔާއިން ޖޫރިމަނާކުރެވި ކޮންމެ އާލާތަކަށް 10 ހާސް ރުފިޔާގެ ރޭޓުން ޖޫރިމަނާކުރެވޭނެ
- އެފަދަ ތަކެތި ހިލޭ ބަހާ ފަރާތްތައް 10 ހާސް ރުފިޔާއިން ޖޫރިމަނާކުރެވޭނެ
- ކުޑަކުއްޖަކަށް ހިލޭ ބަހާނަމަ 50 ހާސް ރުފިޔާއިން ޖޫރިމަނާކުރެވޭނެ
ސަރުކާރުން ބާރުއަޅާ ހިއްވަރު ތިޔަދެނީ ވޭޕް ބޭނުންކުރާ މީހުން އެކަން ހުއްޓާލާފަ ސިގިރޭޓު ބޯން ނޫނީ ދުންފަތުގެ ކޮންމެވެސް އެހެން ބާވަތެއް ބޯން، އެެއްވެސް އިޚްލާސްތެރިކަމެއް ނެތް. ޓޮބޭކޯ އެއްކޮށް މަނާކޮށްބަލަ، ވަކިބައެއްގެ މަންފާއަށް ކަންކަން ނުނިންމާ.