ގެއްލިގެން ހޯދަމުންދިޔަ އުމުރުން 21 އަހަރުގެ ޒުވާނާ ފެނިއްޖެއެވެ.
މިއަދު މެންދުރެއްހާއިރު ފުލުހުން އާންމުންގެ އެހީތެރިކަމަށް އެދިފައި ވަނީ ރ. މާކުރަތު / ތިންތަރި، އަހްމަދު ޝާހީން ގެއްލިގެންނެވެ. އާއިލާއަށް ހަބަރެއްނުވެ އޭނާ ގެއްލިފައިވާ ކަމަށް ފުލުހުންނަށް ލިބުނު ރިޕޯޓަކާ ގުޅިގެން އޭނާ ހޯދަމުންދަނިކޮށް ފެނުނީ މާލެ އިން ކަމަށް އެ އިދާރާއިން މައުލޫމާތު ދިނެވެ.
އެކަމާ ގުޅޭ އިތުރު އެއްވެސް މައުލޫމާތެއް ފުލުހުން ހިއްސާކޮށްފައި ނުވި ނަމަވެސް ޝާހީންގެ ހާލު ރަނގަޅު ކަމަށް ފުލުހުން ބުންޏެވެ.
އިއްޔެ ފުވައްމުލަކުންވެސް ގެއްލުނު ކުޑަ ކުއްޖަކު ހޯދާފައި ވެއެވެ. ފުވައްމުލައް ދިގުވާޑު ފުލެޓް ނަންބަރު 02.ޖީ.18 ފުލެޓް ފަހަތުން ގެއްލުނު އިޒްޔާން ހުޝާމް ރޭ އިރާކޮޅު ހޯދާފައި ވަނީ ފްލެޓެއްގައި ބަންދުވެފައި ހުއްޓައެވެ.
މީގެ ކުރިންވެސް ދޭތެރެ ދޭތެރެއިން އާއިލާއަށް ހަބަރު ނުވެގެން މީހުން ހޯދުމަށް ފުލުހުން އާންމުންގެ އެހީތެރިކަމަށް އެދެއެވެ. އަދި އެފަދައިން ގެއްލޭ ގިނަ މީހުން އިއުލާން ކުރާތާ މާގިނަ އިރުތަކެއް ނުވަނީސް އާއިލާއަށް ހަބަރުވާ ކަމަކީ ފާހަގަކޮށްލެވޭ ކަމެކެވެ.
