ސީ ޓު އެއާ ކާގޯ ހިދުމަތާ ގުޅުނު ބްރިޓިޝް އެއާވޭސްގެ ފްލައިޓެއްގައި 8.2 ޓަނުގެ މުދާ ކެނެޑާއަށް ފޮނުވައިފިއެވެ.
ކަނޑު މަގުން ރާއްޖެއަށް އަންނަ މުދާ ޓްރާންސިޓުކޮށް ވައިގެ މަގުން ދުނިޔޭގެ އެހެން ގައުމުތަކަށް ފޮނުވުމުގެ މި ހިދުމަތުގެ ތެރެއިން ބްރިޓިޝް އެއާވޭސް މެދުވެރިކޮށް ކެނެޑާއަށް ފޮނުވާފައިވާ މުދަލަކީ ސްރީލަންކާ އިން ރާއްޖެ ގެނެސްފައިވާ މުދާތަކެކެވެ.
ބްރިޓިޝް އެއާވޭސްއަކީ ސީ ޓު އެއާ ކާގޯ ހިދުމަތާ ގުޅުނު 11 ވަނަ އެއާލައިންކަމަށްވާ އިރު މި ހިދުމަތް ރާޢްޖޭގައި ފެށުމުގެ ގޮތުން މޯލްޑިވްސް ޕޯޓްސް ލިމިޓެޑް (އެމްޕީއެލް) އާއެކު އެންމެ ފުރަތަމަ އެއްބަސްވުމެއްގައި ސޮއިކޮށްފައިވަނީ ޓާކިޝް އެއާލައިނުންނެވެ. މި އަހަރުގެ މެއި މަހު، ފުރަތަމަ ކާގޯ ޝިޕްމަންޓް ފޮނުވިއިރު މިއަހަރު އޮކްޓޯބަރު މަހު އެކަނިވެސް 96 ކޮންޓެއިނާ (418 ޓަނުގެ މުދާ / 34946 ދާގީނާ) ގެ މުދާ ވައިގެ މަގުން ރާއްޖެއިން ބޭރަށް ފޮނުވާފައިވެއެވެ.
ޓްރާންސްޕޯޓް މިނިސްޓަރު މުހައްމަދު އަމީން މީގެ ކުރިން ވިދާޅުވީ ސީ ޓު އެއާ ކާގޯ ހިދުމަތުގެ ޑިމާންޑު އިތުރުވަމުންދާއިރު އެންމެ އިސްކަމެއްދެނީ އެ ދާއިރާ ރެގިއުލޭޓުކޮށް ކުރިއެރުވުމަށް ކަމަށެވެ. އަދި ރާއްޖެއަކީ ޔޫރަޕާއި މެދު އިރުމަތީގެ ގައުމުތަކަށް ދަތުރުތައް ބާއްވާ ގައުމެއް ކަމަށް ވުމުން މުދާ އުފުލުމުގައި ފުރުސަތުތައް އިތުރުކަމަށެވެ.
