ކުވައިތު އިންޓަނޭޝަނަލް ޕްރައިޒް އޮފް ދަ ހޮލީ ގުރްއާން މުބާރާތުގައި ބައިވެރިވާ ހާފިޒު އަހުމަދު ނަބީހު އަބްދުލްގާދިރަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ބައްދަލުކުރައްވާ ހިތްތަވަރު ދެއްވައިފިއެވެ.
މި މުބާރާތުގައި ނަބީހު ބައިވެރިވެފައިވަނީ މުޅި ގުރްއާން ހިފްޒުކޮށް ކިޔެވުމުގެ ގޮފީގައެވެ. ނަބީހުގެ އިތުރުން އޭނާގެ ބެލެނިވެރިޔާއާ ވެސް ޑރ. ޝަހީމް ވަނީ ބައްދަލުކުރައްވާ ކާމީޔާބީއަށް އެދިވަޑައިގެންފައެވެ.
މި މުބާރާތް ކުރިއަށް ގެންދިއުމަށް ހަމަޖެހިފފައިވަނީ މި މަހުގެ 13 އިން 20 ގެ ނިޔަލަށް ކަމަށް ކުވައިތުގެ ނޫސްތަކުގައި ވަނީ ރިޕޯޓުކޮށްފައެވެ. 2010 ވަނަ އަހަރުން ފެށިގެން ބާއްވާ މި މުބާރާތުގައި ޖަޖުންގެ ޕެނަލާއެކު ޖުމްލަ 85 ގައުމަކުން 127 ފަރާތަކުން ބައިވެރިވާކަމަށް އެ ނޫހުގައި ވަނީ ރިޕޯޓުކޮށްފައެވެ.
ފާހަގަކޮށްލެވޭ ގޮތުގައި ދިވެހިރާއްޖޭގެ ދަރިވަރުން ގައުމީ މުބާރާތްތަކުގައި ދަނީ ފަހުރުވެރި ވަނަތައްވެސް ހާސިލުކުރަމުންނެވެ. އެގޮތުން މެލޭޝިއާގައި ބޭއްވި 64 ވަނަ ބައިނަލްއަގްވާމީ ގުރުއާން ކިޔެވުމާއި ހިތުދަސްކުރުމުގެ މުބާރާތުން ރާއްޖޭގެ ފާތިމަތު ޝާޔާ ޒާހިރު ވަނީ 3 ވަނަ ހާސިލުކޮށްފައެވެ.
ޝާޔާ ހޯދި ކާމިޔާބީ ފާހަގަކޮށް މިނިސްޓަރު ޑރ. ޝަހީމް ވަނީ ޝާޔާ އާއި އޭނާގެ އާއިލާއާއި ބައްދަލުކޮށް، މަރުހަބާ ވިދާޅުވެފައެވެ. މި ކެޓަގަރީން ޝާޔާ ތިންވަނަ ހޯދާފައިވަނީ 94.38 ޕަސެންޓު މާކްސް ހޯދައިގެންނެވެ.
