ރާއްޖޭގެ މީހުން ދިރިއުޅޭ ހުރިހާ ރަށެއްގައި ބޭންކް އޮފް މޯލްޑިވްސް (ބީއެމްއެލް)ގެ އޭޓީއެމްގެ ހިދުމަތް ދިނުމުގެ މަޝްރޫއު ފަށައިފިއެވެ.
މި މަޝްރޫއު އިފްތިތާހްކޮށްދެއްވީ އެކަމަށްޓަކައި މިއަދު ރައީސް އޮފީހުގައި ބޭއްވި ހާއްސަ ރަސްމިއްޔާތެއްގައި ރައީސް ޑރ. މުހައްމަދު މުއިއްޒުއެވެ.
ރާއްޖޭގެ ހުރިހާ ރަށެއްގައި އޭޓީއެމްގެ ހިދުމަތް ދިނުމަށް ބީއެމްލްއާއެކު ސޮއިކޮށްފައި ވާއިރު، މި މަސައްކަތް ކުރިއަށް ގެންދިއުމަށް ހަމަޖެހިފައި ވަނީ ފިޔަވަހިތަކަކަށް ބަހާލައިގެންނެވެ. އެގޮތުން ފުރަތަމަ ފިޔަވަހީގައި 17 ރަށެއްގައި އޭޓީއެމް ބެހެއްޓުމަށް ހަމަޖެހިފައިވެއެވެ.
ފުރަތަމަ ފިޔަވަހީގައި ބެހެއްޓުމަށް ހަމަޖެހިފައިވާ އޭޓީއެމްތައް ރާއްޖެ ގެނެސްފައިވީ ނަމަވެސް އޭޓީއެމް ބަހައްޓަން ކުރަންޖެހޭ ގިނަ މަސައްކަތްތަކެއް އެބަހުރި ކަމަށް ބީއެމްއެލްގެ ސީއީއޯ މުހައްމަދު ޝަރީފް ވިދާޅުވިއެވެ. ނަމަވެސް މި އޭޓީއެމްތައް އަންނަ އަހަރުގެ މާޗު މަހުގެ ނިޔަލަށް ބަހައްޓައި ނިންމަވާނެ ކަމަށް ޝަރީފް ވިދާޅުވިއެވެ.
ޝަރީފް ވިދާޅުވީ މިއަދު އދ. އޮމަދޫގައި އަލަށް ހުޅުވި އޭޓީއެމްއާއެކު 90 ރަށުގައި ބީއެމްއެލްއިން ޖުމްލަ 150 އޭޓީއެމްގެ ހިދުމަތް ދެމުންދާ ކަމަށެވެ. އަދި މުޅި ރާއްޖެއަށް އޭޓީއެމް ހިދުމަތް ދިނުމުގެ މަޝްރޫއު އަންނަ އަހަރުގެ ޑިސެމްބަރު މަހުގެ ނިޔަލަށް ނިންމޭނެ ކަމަށާއި އަންނަ އަހަރު ނިމޭއިރު ބީއެމްއެލް އޭޓީއެމްގެ އަދަދު 250އަށްވުރެ ގިނަވާނެ ކަމަށް އޭނާ ވިދާޅުވިއެވެ.
މި މަޝްރޫއަކީ ދިވެހިރާއްޖޭގެ މީހުން ދިރިއުޅޭ ހުރިހާ ރަށެއްގައި އޭޓީއެމްގެ ހިދުމަތް ގާއިމުކޮށް ހުރިހާ ދިވެހި ރައްޔިތުންނަށް ގާތުން އަދި ފަސޭހަކަމާއެކު ބޭންކިން ހިދުމަތްތައް ފޯރުކޮށްދިނުމަށް ރައީސް ވެވަޑައިގެންނެވި ރިޔާސީ ވައުދުފުޅު ފުއްދެވުމަށް ކުރިއަށްގެންދާ މަސައްކަތެކެވެ.
