މުދައްރިސުން ތަމްރީނުކުރުމުގެ ގައުމީ ޕްރޮގްރާމްގެ ދަށުން ރަށުގައި ތިބެގެން މުދައްރިސްކަން ކިޔެވޭނެ ފުރުސަތު ފަހިކޮށްދިނުމަށް މަސައްކަތް ކުރައްވަމުންދާ ކަމަށް އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ވިދާޅުވެއްޖެއެވެ.
މުދައްރިސުން ތަމްރީނުކުރުމުގެ ގައުމީ ޕްރޮގްރާމް އިފްތިތާހު ކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން މިނިސްޓަރު ވިދާޅުވީ މާލެ އައުމުގެ ބަދަލުގަައި ރަށްރަށުގައި ތިބެގެން މުދައްރިސްކަން ކިޔެވުމަށް ގިނަ ބަޔަކު އެދޭ ކަމަށެވެ. އެހެންކަމުން މި ޕްރޮގްރާމްގެ ދަށުން ރަށްރަށުގައި ތިބެގެން މުދައްރިސްކަން ކިޔެވުމުގެ ފުރުސަތު ފަހިކުރުމަށް މަސައްކަތް ކުރަމުންދާ ކަމަށެވެ.
މިނިސްޓަރު ޝަފީއު ވިދާޅުވީ މި ޕްރޮގްރާމްގައި މި އަހަރު 140އާ ގާތްކުރާ އަދަދަކަށް ދަރިވަރުން ބައިވެރިވީ ކަމުގައިވީ ނަމަވެސް މި ޕްރޮގްރާމްއަށް ވަންނަން ބޭނުންވާ ކުދިންގެ އަދަދު ގިނަވަމުންދާ ކަމަށެވެ. އަދި އުންމީދަކީ އަންނަ އަހަރު އެންމެ މަދުވެގެން 150 ދަރިވަރުން މި ޕްރޮގްރާމްގައި ބައިވެރިކުރުވުން ކަމަށް މިނިސްޓަރު ވިދާޅުވިއެވެ.
މުދައްރިސުންގެ ދަތިކަން އޮތް މިންވަރަށް އަލިއަޅުއްވާލައްވާ ވާހަކަ ދައްކަވަމުން މިނިސްޓަރު ވިދާޅުވީ ވަރަށް ގިނަ މާއްދާތަކުން ޓީޗަރުން ލިބުން ދަތިވެފައިވާ ކަމަށެވެ. އެގޮތުން ޕްރައިމަރީ ޓީޗަރުންގެ އަދަދަށް ބަލާއިރު މިހާރުން މިހާރަށް ވެސް 250 ޓީޗަރުން ބޭނުންވާ ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ޕްރައިމަރީ ޓީޗަރުންގެ އިތުރުން މުދައްރިސުން ލިބުމުގެ ދަތިކަން އެންމެ ބޮޑަށް އޮތީ އިނގިރޭސި، ހިސާބު އަދި ސައިންސް ސްޓްރީމްގެ މާއްދާތަކަށް ކަމަށެވެ. އެގޮތުން ބިޒްނަސް ސްޓްރީމްގެ މާއްދާތަކަށްވުރެ ސައިންސް ސްޓްރީމް މާއްދާތަކަށް ޓީޗަރުން ބޭނުންވާ އަދަދު ގިނަކަން މިނިސްޓަރު ފާހަގަކުރެއްވިއެވެ.
މި އަހަރުގެ ޕްރޮގްރާމްގައި 21 ރަށަކުން 130އަށްވުރެ ގިނަ ދަރިވަރުން ބައިވެރިވެފައިވާކަން މިނިސްޓަރު ވަނީ ފާހަގަކުރައްވާފައެވެ.
