ނިމިދިޔަ ރިޔާސީ އިންތިހާބުގައި ވާދަ ކުރެއްވުމުގެ ފުރުސަތު ލިބިވަޑައި ނުގަތުމުން، ޕީޕީއެމް/ޕީއެންސީގެ އެތެރޭގެ އިންތިހާބަކުން ޑރ. މުހައްމަދު މުއިއްޒަށް ޓިކެޓް ލިބިވަޑައިގަތީ ރަނގަޅަށް ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.

ރާއްޖެޓީވީގެ ފަށާއިރު ޕްރޮގްރާމުގައި ބައިވެރިވެވަޑައިގެން ޔާމީން ވިދާޅުވީ، އެމަނިކުފާނުގެ މައްޗަށް އިއްވާފައި އޮތް ޖަލު ހުކުމާއެކު ޖަލުގައި އިންނެވި އިރު، ޕާޓީގެ ފަރާތުން ލަފާ ބޭނުންވާ ކަންކަމުގައި ލޯޔަރުން މެދުވެރިކޮށް ލަފާ ދެއްވަމުން ގެންދެވި ކަމަށާއި ސޮއި ބޭނުންވާ ފަހަރުތަކުގައި އެކަންވެސް ކުރެއްވި ކަމަށެވެ.

ޔާމީން ވިދާޅުވީ ނިމިދިޔަ ރިޔާސީ އިންތިހާބުގައި އެމަނިކުފާނަށް ވާދަ ނުކުރެއްވޭ ހާލަތު އައުމުން ކެންޑިޑޭޓަކު ދެއްކެވުމަށް ލީޑާޝިޕްގެ ފަރާތުން އެމަނިކުފާނުގެ އަރިހުން އެދިވަޑައިގެންނެވި ކަމަށާއި ނަމަވެސް އެމަނިކުފާނު ވަކި ބޭފުޅަކު ދައްކެވުމަކީ އެންމެ މަސްލަހަތު ހުރި ގޮތް ކަމަށް ނުވާނެތީ، އެތެރޭގެ އިންތިހާބަކުން އެކަން ކުރެވި ކެންޑިޑޭޓަކަށް ޑރ. މުއިއްޒު ވެވަޑައިގަތީ ރަނގަޅަށް ކަމަށެވެ.

"އެކަމުގައި ސުވާލު އުފައްދާނެ ޖާގައެއް ނެތް، އަދި އެއްވެސް ބޭފުޅަކު އެކަމާ ސުވާލެއް އުފައްދާ އައިސްފައެއްވެސް ނުވޭ"

އެއާއެކު ޔާމީން ދެން ވިދާޅުވީ، އެކަން އެހެން ވެފައި އޮތް ނަމަވެސް އިންތިހާބު ބޮއިކޮޓް ކުރަން އެންގެވި ކަމަށާއި އެކަން ކުރެއްވީ، އެމަނިކުފާނާ ނުލައި އިންތިހާބަކަށް ނުދާނެ ކަމަށް ބުނެ ލީޑާޝިޕުން ވާހަކަ ދައްކަމުން ގެންދިޔުމުން ކަމަށެވެ. އަދި ރާއްޖޭގައި އޮތް އެންމެ ބޮޑު އިދިކޮޅު ޕާޓީން އިންތިހާބު ބޮއިކޮޓު ކުރި ނަމަ އެކަން ދުނިޔޭގެ ހެޑްލައިން އަށް ވެސް އެރީސް ކަމަށާއި އެއާއެކު އިތުރު ހާލަތެއް ]އެމަނިކުފާނަށް ފުރުސަތު ލިބުމުގެ ހާލަތެއް[ އުފަންވީސް ކަމަށް ދޭހަވާ މޭރުމަކުން އެކަން ދިފާއު ކުރައްވާފައި ވެއެވެ.

ރައީސް މުއިއްޒަށް ތާއީދު ކުރެއްވުނީތީ މިއަދު ހިތާމަ ކުރައްވާ ކަމަށް ވިދާޅުވަމުން އެމަނިކުފާނު ވަނީ އަންނަ ރިޔާސީ އިންތިހާބުގައި ވާދަ ކުރައްވާނެ ކަމަށް ވެސް މިއަދު ވިދާޅުވެފައެވެ.

މަނީ ލޯންޑަރިންގެ މައްސަލައިގައި 11 އަހަރުގެ ޖަލު ހުކުމެއްގައި އޮންނެވުމަށް ފަހު، މިހާރު ގޭގައި ހުންނެވި ޔާމީން ވިދާޅުވަނީ، ކޯޓުތަކުގައި އަދިވެސް މައްސަލަތައް ހުރި ކަމަށާއި ގަބޫލު ކުރައްވަނީ އޭނާ އާ ދެކޮޅަށް އެ މައްސަލަތައް ނުނިންމޭނެ ކަމަށެވެ. އަދި ވިދާޅުވަނީ އިންސާފުވެރި ޝަރީއަތެއް ލިބިވަޑައިގެން މިނިވަންވެ ވަޑައިގެންފި ނަމަ، އިންތިހާބަށް ނިކުވެވަޑައިގަންނަވާނެ ކަމަށެވެ.

އޭނާ އެހެން ވިދާޅުވި އިރު، 11 އަހަރުގެ ޖަލު ހުކުމް ހައިކޯޓުން ބާތިލް އެހުކުމް އަލުން ބަލަން ދަށު ކޯޓަށް އެންގުމާއެކު މައްސަލަ ވަނީ އަލުން ފެށިފައެވެ.

ވ. އާރަށް ކުށްޔަށް ދޫކުރުމުގެ މުއާމަލަަތުގައި ރިޝްވަތު ގަބޫލު ކޮށްގެން 4 އަހަރު އަދި މަނީ ލޯންޑަރިންނާ ގުޅިގެން 7 އަހަރާއެކު ޖުމްލަ 11 އަހަރުގެ ޖަލު ހުކުމެއް އިއްވާފައި ވަނީ 2022 ވަނަ އަހަރުގެ ޑިސެމްބަރު 25 ވަނަ ދުވަހެވެ. އަދި މިދިޔަ އަހަރުގެ އޭޕްރީލް 11 ވަނަ ދުވަހު ހައިކޯޓުން މައްސަލަ ބާތިލް ކޮށް މައްސަލަ އަލުން ބަލަން ދަށުކޯޓަށް އެންގީ، ދަށު ކޯޓުން މައްސަލަ ބެލިއިރުގައި ބޮޑެތި ގޯސްތަކެއް ހަދާފައިވާ ކަމަށް ތުހުމަތު ކުރެވިގެންނެވެ.

މި ދައުވާގެ އިތުރުން ރ. ފުއްގިރި ކުއްޔަށް ދިނުމުގެ މުއާމަލާތުގައި ރިޝްވަތުގެ ގޮތުގައި 1 މިލިއަން ޑޮލަރު ގަބޫލު ކުރައްވައި، އެ ފައިސާ ލޯންޑާ ކުރެއްވި ކަމުގެ ކުށުގެ ދައުވާވެސް ދަނީ ހިނގަމުންނެވެ.

ހަބަރު އަބްދުﷲ ޔާމީން ސިޔާސީ