މޯލްޑިވްސް މީޑިއާ ކައުންސިލް (އެމްއެމްސީ) އިން ބޭއްވި މިދިޔަ އަހަރުގެ ނޫސްވެރިކަމުގެ އިނާމުގެ ފަނޑިޔާރުން ދިން މާކްސްތަކުގެ ތަފްސީލާއި ރުބްރިކްސް އަދި ފަނޑިޔާރުންގެ ރިޕޯޓު އެ އިދާރާއިން އާންމުކޮށްފި އެވެ.
ނޫސްވެރިކަމުގެ އިނާމަށް އިންސާފުކުރި ގޮތާމެދު ގިނަ ބައެއްގެ ކަންބޮޑުވުންތައް ހުރި މި ދަނޑިވަޅުގައި އެމްއެމްސީން އެކްސްގައި ހިއްސާ ކުރި ޕޯސްޓެއްގައި ވަނީ އެވޯޑު ތަކަށް ކުރިމަތިލާފައިވާ ފަރާތްތަކަށް ފަނޑިޔާރުން ދިން މާކްސްތަކުގެ ހުރިހާ މައުލޫމާތެއް އެކުލެވޭ ޝީޓު ހިއްސާކޮށްފައެވެ.
އެ ޝީޓުގައިވާ ގޮތުން ނޫސްވެރިކަމުގެ އެވޯޑުގައި އެންމެ ބޮޑަށް މައްސަލަ ދިމާވި، ނޫސްވެރިކަމުގެ އެވޯޑްގައި އޯޑިއޯ ވީޑިއޯ ކެޓަގަރީގެ ތަހުގީގީ ނޫސްވެރިކަމުގެ އިނާމު ދީފައި ވަނީ، 'އަދަދު' ނޫހުން ތައްޔާރު ކުރި 'ސްކީލާން' ރިޕޯޓަށް ލިބިފައިވާ މާކްސްތައް ވެސް ހިމެނެއެވެ. އެ ކެޓަގަރީން ހަމައެކަނި އެ އެވޯޑަށް ހުށަހަޅާފައި ވަނީ ވެސް އެ ރިޕޯޓަށް އެކަނިއެވެ.
ޑޮކިއުމެންޓްރީ "ސްކީލާން" ބަލައިގަނެ ތިން ފަނޑިޔާރުންވެސް ވަނީ މާކްސް ދީފައެވެ. އެ ޑޮކިއުމަންޓްރީގެ ފަނޑިޔާރުކަން ކުރައްވާފައި ވަނީ ޝަމްއާން ޝާކިރާއި އަބްދުﷲ އަޒްމީން އަދި އަޝްވާ އެވެ. 69.47 މާކްސްއާ އެކު އެ ކެޓަގަރީން "ސްކީލާން" އެވޯޑު ހާސިލް ކުރިއިރު އިނާމް ދިނުމުގެ އުސޫލުގައިވާ ގޮތުން އެ ކެޓަގަރީއަކުން އެވޯޑް ލިބޭނީ 65 ޕަސެންޓަށް ވުރެ މަތިން އެންމެ ގިނައިން މާކްސް ލިބޭ ހުށަހެޅުމަކަށެވެ.
އަދި ތަހުގީގީ ނޫސްވެރިކަމުގެ ރޮނގުން ނޫސްވެރިން ރިސްކީ، ބުރަ މަސައްކަތްތަކެއް ކޮށް ފެންވަރުމަތީ އުފެއްދުންތަކެއް އެ ޑޮކިއުމަންޓްރީގައި ހުށަހަޅާފައިވާ ކަމަށް ފަނޑިޔާރުން ވަނީ އެ ފަރާތްތަކުގެ ރިޕޯޓުގައި ވެސް ފާހަގަ ކޮށްފައެވެ. އަދި މިދިޔަ އަހަރު ދިން ހިޔާލުތައް އެމްއެމްސީން ބަލައިގަނެ ބައެއް ކަންކަން ރަނގަޅު ކޮށްފައިވާ ކަމަށާއި ނަމަވެސް އަންނަ އަހަރަށްވެސް ރަނގަޅު ކުރަން ޖެހޭ ބައެއް ކަންކަން ފަނޑިޔާރުންގެ ރިޕޯޓުގައި ވަނީ ފާހަގަ ކޮށްފައެވެ.
އެމްއެމްސީއިން ދާދި ފަހުން ވަނީ އެއްވެސް ދާއިރާއަކުން އެވޯޑް ދިނުމުގައި އިނާމު ދިނުމުގެ އުސޫލާ ހިލާފަށް އެއްވެސް ކަމެއް ކޮށްފައެއް ނުވާނެ ކަމުގެ ޔަގީންކަން ދީފައެވެ. އަދި އެ ކައުންސިލުން ހުރިހާ ވިސްނުމެއް ގެންގުޅެފައި ވަނީ އިންސާފަށް ބަލައިގެން ކަމަށްވާތީ، އެވޯޑްގެ ކަންކަން ބެލެހެއްޓުމަށް އޮޑިޓް ފާމެއް ހަމަޖެއްސުމަކީ ވެސް ބޭނުންވި ނަމަވެސް އެކަން ނުވީ އިނާމުގެ ކަންކަމަކަށް އެކަށީގެންވާ ބަޖެޓެއް ލިބިފައިނެތުމުން ކަމަށާއި އެ ބަޖެޓު ހޯދުމަށް ކައުންސިލުން މަސައްކަތްކޮށްފައިވާނެ ކަމަށް ވެސް އެމްއެމްސީއިން ބުނެފައި ވެއެވެ.
މި ލިޔުންތައް އެމްއެމްސީން އާންމުކޮށްފައިވާއިރު، ނޫސްވެރިކަމުގެ އިނާމާ ގުޅޭ މައްސަލަތަކެއް ތަހުގީގު ކުރަން ކަމަށް ބުނެ އެންޓި ކޮރަޕްޝަން ކޮމިޝަނުން (އޭސީސީ) އިންވެސް ވަނީ އެމްސީސީއަށް ވަދެ މައްސަލަ ތަހުގީގު ކުރަން ފަށާފައެވެ.
