އިގްތިސާދަށް ދިރުން އަންނަ މިންވަރަކުން ރަށްރަށުގައި މިހާރު ނުނިމި ހުރި މަޝްރޫއުތައް ނިންމުމާއި، އައު މަޝްރޫއުތައް ފެށުންވެސް ކުރިއަށްދާނެކަމަށް ނައިބު ރައީސް ހުސައިން މުހައްމަދު ލަތީފު ވިދާޅުވެއްޖެއެވެ.
"ހަށިހެޔޮ ރާއްޖެ" ޕްރޮގްރާމް ފެށުމަށްޓަކައި ކުޅުދުއްފުށި ސިޓީގައި ބޭއްވި ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކަފުޅުގައި ނައިބު ރައީސް ވިދާޅުވީ ގައުމަށް އާމްދަނީ ލިބޭނެ އެތައް މަގެއް މިއަދު ފަހިވަމުންދާކަމަށެވެ. އަދި ރައްޔިތުންނަށް އުފާ ފާގަތި ދުވަސްތަކެއް އަދުގެ ސަރުކާރުން ހޯދައިދޭނެކަމުގައި ނައިބު ރައީސް ވިދާޅުވިއެވެ.
މީގެ އިތުރުން ނައިބު ރައީސް ވިދާޅުވީ ރައީސްގެ އެންމެ ބޮޑު އެއް އަމާޒަކީ ރާއްޖޭގެ އިގްތިސާދު ވެއްޓެމުންދިޔަ ފުން އަނދަވަޅުން ސަލާމަތްކުރުންކަމަށެވެ. އަދި މިއަދު އިގްތިސާދު ކުރިއެރުވުމަށް ކާމިޔާބު މަސައްކަތްތަކެއް ފެށ،ި ކަންކަން ހަމަމަގަށް އެޅެމުންދާ މަންޒަރު ފެންނަކަމަށް އެމަނިކުފާނު ވިދާޅުވިއެވެ. މި ދަނޑިވަޅުގައި ގައުމު މިއޮތް ހާލަތަކީ ރައްޔިތުންގެ ފައިދާ ނަހަމަގޮތުގައި ބަޔަކު ހިފުމުގެ ސަބަބުން ދިމާވި ހާލަތެއްކަން ފާހަގަކުރައްވަމުން ނައިބު ރައީސް ވިދާޅުވީ އެހެން ނަމަވެސް މިހާރު ގައުމަށް އާމްދަނީ ލިބޭނެ އެތައް މަގެއް ފަހިވަމުންދާ ކަމަށެވެ.
އިތުރަށް ނައިބު ރައީސް ވަނީ މިއަދު އިފްތިތާހު ކުރެވުނު "ހަށިހެޔޮ ރާއްޖެ" ޕްރޮގްރާމް ޒޯން އެކެއްގައި ފެށިނަމަވެސް މި ޕްރޮގްރާމަކީ ރާއްޖޭގެ އެކި ސަރަޙައްދުތަކުގައި ކުރިއަށްދާނެކަމަށް ޔަގީންކުރައްވާ ކަމަށެވެ. އަދި މި ޕްރޮގްރާމްގެ ޓްރެއިނަރުންނަށް ލިބޭ މައުލޫމާތުގެ ސަބަބުން އޭގެ ފައިދާ ރައްޔިތުންނަށް އެންމެ ފުރިހަމަ ގޮތުގައި ލިބޭނެކަމަށް އުއްމީދުކުރައްވާކަމަށްވެސް އެމަނިކުފާނު ވިދާޅުވިއެވެ.
"ހަށިހެޔޮ ރާއްޖެ" ޕްރޮގްރަމްގެ ތެރެއިން ރާއްޖޭގެ އަތޮޅުތައް 6 ޒޯން އަކަށް ބަހާލައިގެން ލީޑަރުން ތަމްރީންކުރުމުގެ މަސައްކަތް މިހާރު ވަނީ ފަށާފައެވެ. އެގޮތުން ޒޯން 1ގައި ހިމެނޭ ހއ، ހދ އަދި ށ އަތޮޅުގެ ރަށްރަށުގައި ހިމެނޭ ސްޕޯޓްސް ކައުންސިލާ އާއި ޔޫތު އެސޯސިއޭޓުން ތަމްރީން ކުރުމަށް ހަމަޖެހިފައިވެއެވެ.
