ގްރޭޑް 8 ގައި މިހާރު ކިޔަވާ ދަރިވަރުންގެ ޓެސްޓު ދެފިޔަވައްސަކަށް ބަހާލައިގެން ކުރިއަށް ގެންދިއުމަށް އެޑިއުކޭޝަން މިނިސްޓްރީން ބުނެފިއެވެ.
މީގެ ކުރިން އެޑިއުކޭޝަނުން ނިންމާފައި އޮތީ ގްރޭޑް 8 ގެ ދަރިވަރުންގެ ޓެސްޓުތައް އަންނަ އަހަރު ފެބްރުއަރީ 15 އިން 27 އަށް ހުރިހާ މާއްދާއެއް އެއްކޮށް ނަގާ ނިންމާށެވެ. އެހެންނަމަވެސް މިދިޔަ ބުރާސްފަތި ދުވަހު ހުރިހާ ސްކޫލްތަކަކަށް ފޮނުވި މެމޯގައި ބުނީ ޕްރިންސިޕަލުންނާ އެކު ބޭއްވި ޕޮލިސީ މަޝްވަރާ ބައްދަލުވުންތަކަށް ފަހު ގިނަ އަދަދެއްގެ ޕްރިންސިޕަލުންގެ ލަފަޔާ އެކު، މި އަހަރު ގްރޭޑް 8 ގެ ދަރިވަރުންގެ ދެވަނަ ޓާމްގެ މިޑް ބްރޭކަށް ފަހު ސްޓްރީމް ކުރުމަށް ނިންމާފައިވާކަމަށެވެ.
އެޑިއުކޭޝަން މިނިސްޓްރީން މިހާރު ގެނައި ބަދަލާއެކު ބައެއް މާއްދާތަކުގެ ޓެސްޓް ޑިސެމްބަރު މަހުގައި ބޭއްވުމަށް ނިންމާފައިވާއިރު، ބާކީ މާއްދާތަކުގެ ޓެސްޓް އޮންނާނީ ފެބްރުއަރީ މަހުގައެވެ. މި އަހަރު ޑިސެމްބަރު 14 އިން 19 އަށް ބޭއްވުމަށް ނިންމާފައިވާ ޓެސްޓުތަކަކީ؛
- ކޮންބައިންޑް ސައިންސް
- ކޮންބައިންޑް ބިޒްނަސް
- ހިސާބު މާއްދާ
- ސޯޝަލް ސްޓަޑީޒް
- ހެލްތު އެންޑް ޕީއީ އަދި ކްރިއޭޓިވް އާޓްސްގެ ފޯމެޓިވް އެސެސްމަންޓް
އަންނަ އަހަރު ފެބްރުއަރީ 15 އިން 20 އަށް ދެވަނަ ޓެސްޓު ނަގާ ސްޓްރީމްތަކުގެ ތެރޭގައި ހިމެނެނީ އިސްލާމް، ދިވެހި އަދި އިނގިރޭސިއެވެ. މި އަހަރު ގްރޭޑް 8 ގައި ކިޔަވާ ދަރިވަރުންގެ ޓާމް ޓެސްޓުތައް ބާއްވާނީ އަންނަ އަހަރުގެ ފެބްރުއަރީ 8 އިން 22 އަށެވެ. މީގެ އިތުރުން އެޑިއުކޭޝަނުން ބުނީ މި ބަދަލު ގެނެސްފައިވާ ނަމަވެސް އެސެސްމަންޓް ފޯ ލާނިން ކުރިއަށް ގެންދަންވާނެކަމަށެވެ. އަދި މި އަހަރު ދެވަނަ ޓާމްގެ ރިޕޯޓް ފޮތް ހުރިހާ ދަރިވަރުންނަށް ވެސް އަންނަ އަހަރު ފެބްރުއަރީ 17 ގައި ދޫކުރަން ވާނެކަމަށެވެ.
