މާލޭގައި ހުންނަ ސެންޓާ ފޯ ހަޔާ ސެކަންޑްރީ އެޑިއުކޭޝަން (ސީއެޗްއެސްއީ)ގެ އިމާރާތް، ރަސްމީކޮށް އަލުން ހުޅުވައިފިއެވެ.
ސީއެޗްއެސްއީގައި މިރޭ ކުރިއަށް ގެންދިޔަ ހާއްސަ ރަސްމިއްޔާތެއްގައި އެ ސްކޫލް އަލުން ހުޅުވާދެއްވާފައި ވަނީ ރައީސުލްޖުމްހޫރިއްޔާ، ޑރ. މުހައްމަދު މުއިއްޒުއެވެ. މި ރަސްމިއްޔާތުގައި އެސްކޫލްގެ ދަރިވަރުންގެ ފަރާތުން ވަނީ ސްކޫލުގެ އެހާރާއި މިހާރުގެ ހަނދާނީ ރަމްޒެއް ވެސް ރައީސަށް އަރުވާފައެވެ.
ސީއެޗްއެސްއީ ހިންގަމުންދިޔަ އިމާރާތް ބޭނުން ކުރުން ހުއްޓާލާ ހުޅުމާލޭގައި އަލަށް ބިނާ ކުރި އިމާރާތަށް އެ ސްކޫލްގެ ކިޔެވުން ބަދަލު ކުރީ މިދިޔަ އޮގަސްޓު މަހުއެވެ. ނަމަވެސް މާލޭގައި ސަރުކާރުގެ އޭލެވެލް ސުކޫލެއް ނެތުމުން އެކަމުގެ ކަންބޮޑުވުން ދަރިވަރުންނާއި ބެލެނިވެރިން ފާޅުކުރާ ކަމަށް ބުނެ އެޑިއުކޭޝަނުން އަނެއްކާވެސް ނިންމީ ކުރީގެ އިމާރާތުގައި އޭލެވެލް ކިޔަވާދޭން ފެށުމަށެވެ.
އެއާއެކު މިދިޔަ ސެޕްޓެމްބަރު މަހުގެ 1 ވަނަ ދުވަހުން ފެށިގެން ސްކޫލްގައި ކިޔަވާދޭން ފެށި ނަމަވެސް ރަސްމީކޮށް ސްކޫލް ހުޅުވާފައި މި ވަނީ މިރޭގެ ރަސްމިއްޔާތާއެކު އެވެ.
ސީއެޗްއެސްއީ އެންމެ ފުރަތަމަ ހުޅުވާފައި ވަނީ 3 ޖުލައި 1979 ވަނަ އަހަރުއެވެ. ސައިންސް އެޑިއުކޭޝަން ސެންޓަރުގެ ނަމުގައި ހުޅުވި އެ ސްކޫޅްގެ ނަން 2000 ވަނަ އަހަރު ވަނީ ސީއެޗްއެސްއީއަށް ބަދަލުކޮށްފައެވެ.
މާލޭގައި މި އިމާރާތުގައި ކިޔަވައިދޭން އަލުން ފެށިޔަސް، ހުޅުމާލޭގައި ވެސް އޭލެވެލް އަށް ކިޔަވައިދޭން ނިންމާފައިވާއިރު ރައީސް މީގެ ކުރިން ވަނީ މަތީ ސާނަވީއަށް ކިޔަވަން ބޭނުންވާ ހުރިހާ ކުދިންނަށް މާލޭގަ އާއި ރާއްޖޭގެ އެކި ކަންކޮޅުތަކުގައި ގިނަ ފުރުސަތުތައް ސަރުކާރުން އިތުރުކުރެއްވުމަށް މަަސައްކަތް ކުރައްވަމުންދާކަން ހާމަކުރައްވާފައެވެ.
