މިދިޔަ ބުރާސްފަތި ދުވަހު އަތުލައިގަތް 5.9 ކިލޯ މަސްތުވާތަކެތީގެ މައްސަލައިގައި 3 މީހަކު ހައްޔަރުކޮށްފިއެވެ.
ފުލުހުން ބުނީ މި މައްސަލައިގައި ހައްޔަރު ކޮށްފައިވަނީ:
- ހއ. ދިއްދޫ، ފާގަތިގެ، އަަހުމަދު ނަސީރު (45އ)
- ގއ. ކަނޑުހުޅުދޫ، ނެސްޓް، އަލީ އައިހަމް (18އ)
- ރޮހަމާން، ބަނގްލަދޭޝް (29އ) ކަމަށެވެ.
5.9 ކިލޯގެ މަސްތުވާތަކެތި މިދިޔަ ބުރާސްފަތި ދުވަހު (އޮކްޓޫބަރު 31) ގައި އަތުލައިގެންފައިވަނީ ބެންކޮކުން ރާއްޖެ ގެނެސްފައިވާ އެއާފްރައިޓް ޝިޕްމަންޓެއް ބަލައިފާސްކުރުމުގެ ތެރޭގައެވެ. އަތުލައިގަނެވުނު މި މަސްތުވާތަކެތީގެ ތެރޭގައި ހިމެނެނީ މަސްތުވާތަކެތީގެ ބާވަތެއް ކަމަށްވާ ކެނަބިސް އަދި ކެތިނޯން ކަމަށް ކަސްޓަމްސް އިން ވަނީ ބުނެފައެވެ. އަދި މިތަކެތީގެ މަގުމަތީ އަގު ތިން މިލިއަނަށް ( 3,348,000.00 ރ) އަރާ ކަމަށްވެސް ކަސްޓަމްސް އިން ވަނީ ބުނެފައެވެ.
މި މައްސަލައިގައި ފުލުހުން ހައްޔަރު ކުރި އުމުރުން 45 އަހަރުގެ އަހުމަދު ނަސީރު ހައްޔަރުކޮށްފައިވަނީ ކަސްޓްމަސް އިން ފުލުހުންނާ ހިއްސާކުރި މައުލޫމާތަކާ ގުޅިގެން އޮކްޓޫބަރު 31 ވަނަ ދުވަހުގެ ރޭ ވެލާނާ އިންޓަނޭޝަނަލް އެއާޕޯޓުންނެވެ. ކައުންޓާ ނާކޮޓިކްސް އިންޓެލިޖެންސާއި ޑްރަގް އެންފޯސްމަންޓު ގުޅިގެން ކުރިއަށް ގެންދިގަ ކޮންޓްރޯލް ޑެލިވަރީ އޮޕަރޭޝަނުގައި އަލީ އައިހަމް އަދި ރޮހަމާން ހައްޔަރުކޮށްފައިވާ ކަމަށް ފުލުހުން ވަނީ ބުނެފައެވެ.
މީގެއިތުރުން ފުލުހުން ބުނީ މި މައްސަލައާ ގުޅިގެން މި ތިން މީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން އަަހުމަދު ނަސީރުގެ ބަންދަށް ފަސް ދުވަހަށް، އަލީ އައިހަމްގެ ބަންދަށް 10 ދުވަސް އަދި ރޮހަމާން ހަތް ދުވަހަށް ބަންދުކުރުމަށް އަމުރުކޮށްފައިވާ ކަމަށެވެ.
ފުލުހުން ބުނީ މި މައްސަލަ އިތުރަށް ތަހުގީގު ކުރަމުން ދާ ކަމަށެވެ.
