އިސްލާމީ މަރުކަޒަށް 40 އަހަރު ފުރޭ މުނާސަބަތާއި ގުޅިގެން، އިސްލާމީ މަރުކަޒު ސާފުކޮށް ރީތި ކުރުމުގެ މަސައްކަތް އިސްލާމިކް މިނިސްޓްރީގެ މުވައްޒަފުން ކުރިއަށް ގެންގޮސްފިއެވެ.
އެގޮތުން އިއްޔެ ހެނދުނުން ފެށިގެން އެ މިނިސްޓްރީގެ އިސްވެރިންނާއި މުވައްޒަފުން ވަނީ އިސްލާމީ މަރުކަޒުގައި ކުލަ ލުމުގެ މަސައްކަތާއި ގަސްބުރުތައް ސާފުކޮށް ރީތިކުރުމުގެ މަސައްކަތާއި، މުންނާރު ސާފުކުރުމާއި ކުނި އުކާލުމުގެ މަސައްކަތް ކުރިއަށް ގެންގޮސްފައެވެ.
މީގެއިތުރުން މަރުކަޒުގެ ބަގީޗާތައް ރީތިކުރުމަށް މުވައްޒަފުން ގަސް ހޯދާފައި ވާއިރު މި މަސައްކަތަށް ހެޔޮ އެދޭ އެކި ފަރާތްތަކުން ވަނީ އެހީތެރިކަން ފޯރުކޮށްދީފައެވެ.
މި މަަސައްކަތުގައި އިސްލާމިކް މިނިސްޓްރީގެ ގިނަ އަދަދެއްގެ މުވައްޒަފުން ވަނީ ބައިވެރިވެފައެވެ.
އިސްލާމީ މަރުކަޒަށް 40 އަހަރު ފުރޭނީ މިމަހުގެ 11 ވަނަ ދުވަހުއެވެ. މަރުކަޒަށް 40 އަހަރު ފުރުން ފާހަގަ ކުރުމަށް އެކި ކަންކަން އަންނަނީ ރާވަމުންނެވެ.
އިސްލާމީ މަރުކަޒު ތަރައްގީކޮށް ހުޅުވާފައިވަނީ 11 ނޮވެންބަރު 1984 ވަނަ އަހަރު އެވެ. މި މަރުކަޒު އިމާރާތް ކުރުމުގެ މަސައްކަތްކުރީ ސަރުކާރުން ކޮންޓްރެކްޓް ކޮށްގެން ގެނައި މެލޭޝިއާގެ ބައެކެވެ. ނަމަވެސް މިސްކިތުގެ ވަޑާމުގެ މުހިންމު މަސައްކަތްތަކާއި، ފުރާޅު ހިޔާކުރުމާއި، ކުރެހުންތަކާއި ލިޔުންތައް ކަނޑާ ނަގައި ތަތްކޮށްފައި ވަނީ ރާއްޖޭގެ ޒުވާން ފަންނާނުންނެވެ.
