ދައުލަތަށް ގިނަ ދުވަހު ހިދުމަތް ކުރެއްވި ޝަހީބާ މުހައްމަދު އަވަހާރަވެއްޖެއެވެ.
ދައުލަތަށް ހިދުމަތް ކުރެއްވުމުގެ ގައުމީ އިނާމު ވެސް ލިބިވަޑައިގެންނެވި ޝަހީބާ އަވަހާރަވެފައި ވަނީ އުމުރުފުޅުން 77 އަހަރުގައެވެ. ޝަހީބާ އަވަހާރަވުމާ ގުޅިގެން ރައީސް ޑރ. މުހައްމަދު މުއިއްޒު ވަނީ އެކަމުގެ ހިތާމައިގައި ބައިވެރިވެވަޑައިގެން އާއިލާއަށް ތައުޒިޔާ ވިދާޅުވެފައެވެ.
"މާތްﷲގެ ރުއްސެވުމާއި ފުއްސެވުމުގައި، ސުވަރުގޭގެ ދާއިމީ ނިއުމަތުގައި މަރުހޫމާ ޝަހީބާ މުހައްމަދު ލަހައްޓަވާށިއެވެ. އާމީން." ރައީސް އެކްސްގައި ހިއްސާ ކުރެއްވި ކުރު ޕޯސްޓުގައި ވެއެވެ.
17 ޖޫން 1962 ގައި ޕޯސްޓް އޮފީސްގެ ވަގުތީ ކާތިބާއެއްގެ ވަޒީފާއިން އެކަމަނާ ދައުލަތުގެ ހިދުމަތް ފެށްޓެވިއިރު އޭގެ އިތުރުންވެސް ދައުލަތުގެ ތަފާތު ދާއިރާތަކުގައި މަސައްކަތްކުރެއްވިއެވެ. އެގޮތުން މަހްކަމަތުއްޝަރްއިއްޔާގެ 2 ނަންބަރު ކާތިބާ ކަމާއި އިލެކްޓްރިކް ޑިޕާޓްމަންޓުގެ 2 ނަންބަރު ކާތިބާ ކަމާއި، މިނިސްޓްރީ އޮފް ޖަސްޓިސްގެ 2 ނަންބަރު ކާތިބާ ކަމުގެ ވަޒީފާވެސް ޝަހީބާ ވަނީ އަދާ ކުރައްވާފައެވެ.
ހަމައެހެންމެ މަޖިލީހުގައި 9 އަހަރަށްވުރެ ދިގު މުއްދަތެއްގައި ހިދުމަތް ކުރެއްވިއިރު، މަޖިލީހުގެ ސެކްރެޓެރީ ކަމާއި، ސީނިއާ ސެކްރެޓެރީ ކަމާއި، އޮފީސް އެސިސްޓެންޓް ކަމުގެ މަގާމު އަދާކުރެއްވިއެވެ.
މީގެ އިތުރުންވެސް ސައިންސް އެޑިޔުކޭޝަން ސެންޓަރުގެ އެޑްމިނިސްޓްރޭޓަރުގެ މަގާމާއި، ސީނިއާ އެޑްމިނިސްޓްރޭޓަރުގެ މަގާމާއި، ހެޑް އޮފް އެޑްމިނިސްޓްރޭޝަންގެ މަގާމު ޝަހީބާ ފުރުއްވާފައިވާއިރު އެކަމަނާއަށް ދައުލަތަށް ހިދުމަތް ކުރެއްވުމުގެ އިނާމު ލިބިވަޑައިގަތީ މި އަހަރުއެވެ.
