ބިންވެރިޔާ ސްކީމްގެ ދަށުން ގުޅިފަޅުން ދޫކޮށްފައިވާ ގޯތި ލިބިފައިވާ ފަރާތްތަކުގެ ގުރުނެގުމާއި ގުޅިގެން ޝަކުވާ ހުށަހެޅުމަށް ހުޅުވާލައިފިއެވެ.
ގުޅިފަޅުން ގޯތި ލިބުނު ފަރާތްތަކުގެ މެދުގައި ގުރުނެގުން ކުރިއަށް ގެންގޮސްފައި ވަނީ މިދިޔަ އަންގާރަ ދުވަހު ދަރުބާރުގެ ރަންނަބަނޑޭރި މާލަމްގައެވެ.
ޝަކުވާ ހުށަހެޅުމަށް ފުރުސަތު ހުޅުވާލާފައި ވާއިރު، ހައުސިން މިނިސްޓްރީއިން ވަނީ ގޯތި ލިބުނު ފަރާތްތަކުގެ ފޯމު ނަންބަރާއި، ލޮޓް ނަންބަރު އަދި އެގޯތިތަކުގެ ބޮޑުމިނުގެ ތަފްސީލް ހިމެނޭ ލިސްޓު ވެސް އާންމުކޮށްފައެވެ.
ގުޅިފަޅުން ދޫކޮށްފައިވާ ގޯތިތައް:
- 1250 އަކަފޫޓުގެ 669 ގޯތި
- 1650 އަކަފޫޓުގެ 1234 ގޯތި
- 2050 އަކަފޫޓުގެ 916 ގޯތި
- 2450 އަކަފޫޓުގެ 473 ގޯތި
- 2850 އަކަފޫޓުގެ 158 ގޯތި
- 3250 އަކަފޫޓުގެ 49 ގޯތި
- 3650 އަކަފޫޓުގެ 21 ގޯތި
ގުޅިފަޅުން ގޯތި ލިބިފައިވާ ފަރާތްތަކުން އެއްވެސް ޝަކުވާއެއް އޮތްނަމަ، ހިޔާވަހި ޕޯޓަލް މެދުވެރިކޮށް އަންނަ މަހުގެ 7 ވާ ބުރާސްފަތި ދުވަހުގެ މެންދުރުފަހު 2:00ގެ ކުރިން ޝަކުވާ ހުށަހެޅުމަށް ހައުސިން މިނިސްތްރީއިން ވަނީ އެދިފައެވެ.
ގުޅިފަޅުން ގޯތި ލިބޭ ފަރާތްތަކުގެ ގުރުނެގުމުގެ ކަންކަން ހައުސިން މިނިސްޓްރީގެ މުވައްޒަފުން ކުރިއަށް ގެންގޮސްފައިވާތީ، ގޯތި ލިބުނު ބައެއް ފަރާތްތަކުން ވަނީ ކަންބޮޑުވުން ފާޅުކޮށްފައެވެ. ނަމަވެސް ގުރުނެގުމުގެ ކަންކަން ކުރިއަށް ގެންދާނީ ހައުސިން މިނިސްޓްރީއިން އެކުލަވާލާފައިވާ ލިސްޓުގައިވާ ތަރުތީބުން، އެކަމަށް ކަނޑައަޅާފައިވާ އެ މިނިސްޓްރީގެ މުވައްޒަފުންކަން މިނިސްޓްރީއިން ވަނީ ގުރުނެގުމުގެ ކުރިން އިއުލާނުކޮށްފައެވެ.
