ރާއްޖެއަށް ސިއްރުން އެތެރެކުރަން އުޅުނު ގިނަ އަދަދެއްގެ ސިނގިރޭޓް ކަސްޓަމްސްއިން އަތުލައިގެންފިއެވެ.
ކަސްޓަމްސްއިން އިން ބުނީ ހޯކްސް ޕްރައިވެޓް ލިމިޓެޑްގެ އެޖެންޓްކަމުގެ ދަށުން އޮކްޓޯބަރު 24، 2024 ވަނަ ދުވަހު ރާއްޖެ އައި "އެމްޓީ ހޯކްސް ޖަވާހިރު" ނަމަކަށް ކިޔާ ބޯޓަކުން ގިނަ އަދަދެއްގެ ސިނގިރޭޓް އެތެރެކުރަން އުޅޭކަމުގެ މައުލޫމާތު، އޮކްޓޯބަރު 25 ވަނަ ދުވަހުގެ ރޭ ކަސްޓަމްސް އަށް ލިބިފައިވާ ކަމަށެވެ. މި މައުލޫމާތާއި ގުޅިގެން, ހިންގުނު ހާއްސަ އޮޕަރޭޝަނެއްގައި އެތަކެތި ކަސްޓަމްސްގެ ބެލުމުގެ ދަށަށް ގެނެވިފައިވާ ކަމަށް ވަނީ ބުނެފައެވެ.
ކަސްޓަމްސް އިން ބުނީ މި ބޯޓުން ހޯކްސް ޕްރައިވެޓް ލިމިޓެޑްގެ ލޯކަލް ދޯންޏެއްކަމަށްވާ "ހޯކްސް ރޯދި" އަށް އަރުވައިގެން ކ. ތިލަފުއްޓަށް ގެނެސް, އެކުންފުނީގެ ނަމުގައި ރަޖިސްޓްރީ ކޮށްފައިވާ ޓްރަކަކަށް އެތަކެތި އަރުވައިގެން ގެންގޮސް، ބޭލުމުގެ މަސައްކަތް ކޮށްފައިވަނީ ކ. ތިލަފުށީގައި ހުންނަ އެ ކުންފުނީގެ ބޯޓު ޔާޑަށް ކަމަށެވެ. އެތަކެތި ބޭލުމަށް މަސައްކަތް ކޮށްފައި ވަނީ އޮކްޓޯބަރު 25 ވަނަ ދުވަހުގެރޭ ގާތްގަނޑަކަށް 10:00 އެހާކަށް ހާއިރުކަމަށް ކަސްޓަމްސް އިން ވަނީ ބުނެފައެވެ.
މީގެ އިތުރުން ކަސްޓަމްސް އިން ބުނީ އެތަކެތި ބޭލުމަށް މަސައްކަތްކުރި ބޯޓު ޔާޑުގައި އިތުރު ސިނގިރޭޓް ހުރިކަމަށް ޝައްކުކުރެވޭތީ, ކޯޓު އަމުރެއްގެ ދަށުން މިހާރު ދަނީ އެތަން ބަލައިފާސްކުރަމުން ކަމަށެވެ. މިހާތަނަށް "ހޯކްސް ބޯޓްޔާޑު" ބަލާފާސްކުރި ކުރުމުން، އެތަނުގައި ހުރި އެކޮމަޑޭޝަނުންނާ، ވޯކްޝޮޕުން މެންޗެސްޓާ ބްރޭންޑުގެ ސިނގިރޭޓު (ގާތްގަނޑަކަށް 1.695 މިލިއަން ސިނގިރޭޓް ސްޓިކްސް) ފެނިފައިވާކަމަށާއި މިސިނގިރޭޓްތައް މިހާރު ކަސްޓަމްސްގެ ބެލުމުގެ ދަށަށް ގެނެވިފައިވާ ކަމަށެވެ.
މިއީ ރާއްޖެއަށް ސިއްރުން މުދާ އެތެރެކުރަން އުޅުނުކަމަށް ތުހުމަތުކުރެވޭ މައްސަލައެއް ކަމަށް ވާތީ، މި މައްސަލައިގެ ތަހުގީގް ކަސްޓަމްސްއިން ފަށާފައިވާކަމަށް ކަސްޓަމްސް އިން ވަނީ ބުނެފައެވެ. ރާއްޖެއަށް އެތެރެކުރެވޭ މުދަލުގެ ލިޔެކިއުން ނިންމުމާއި މުދާ ބަލައިފާސްކުރުމުގެ މަރުހަލާތަކުގައި ކަސްޓަމްސްއަށް ލިބޭ އިންޓެލިޖެންސް މައުލޫމާތާއި ކަސްޓަމްސްގެ ހިރާސް ނިޒާމުގެ ތެރެއިން ކަނޑައެޅޭ ގޮތެއްގެމަތީން އަމަލުކުރާނެ ކަމަށްވެސް ވަނީ ބުނެފައެވެ.
އިތުރަށް ކަސްޓަމްސް އިން ބުނީ ރާއްޖެއަށް އެތެރެކުރެވޭ މުދަލާގުޅޭގޮތުން ކަސްޓަމްސްގެ ގާނޫނު ތަންފީޒްކުރުމުގައި ކަސްޓަމްސްއިން ފަސްނުޖެހޭނެ ކަމަށެވެ. އަދި މިފަދަ ހާއްސަ އޮޕަރޭޝަންތައް ހިންގުމުގަ އާއި ތަހްގީގުތައް ކުރުމުގައި ދިވެހި ފުލުހުންގެ ހިދުމަތުން ކަސްޓަމްސް އަށް ދޭ އެހީ ފާހަގަކޮށްފައެވެ. އަދި މި އޮޕަރޭޝަން ހިންގުމުގައި މޯލްޑިވްސް ނޭޝަނަލް ޑިފެންސް ފޯސްގެ ކޯސްޓް ގާޑުން ދިން އެހީތެރިކަންވެސް ފާހަގަކޮށްފައެވެ.
