އެކި އެކި ސަބަބުތަކާހުރެ ޕްރޮސެކިއުޓަރު ޖެނެރަލް (ޕީޖީ) އޮފީހަށް ހުށަހަޅާފައިވާ ޝަކުވާތައް ރަސްމީކޮށް ހުށަހެޅުމަށް ހުޅުވާލި މުއްދަތުގައި ދައުވާތަކާއި، ބަންދު މުރާޖައާ ކުރުމަށް އެދި 539 ފޯމު ހުށަހަޅާފައިވާ ކަމަށް އެ އޮފީހުން ބުނެފިއެވެ.
ޕީޖީ އޮފީހުގެ އެކި މައްސަލަތަކާ ގުޅޭ ގޮތުން ޝަކުވާ ހުށަހެޅުމަށް 20 ދުވަހުގެ މުއްދަތެއް ޕީޖީގެ މަގާމާ ހަވާލުވެވަޑައިގަތުމަށް ފަހު ޕީޖީ އައްބާސް ޝަރީފް ވަނީ ދެއްވާފައެވެ.
ޕީޖީ އޮފީހުން ބުނީ އެ އޮފީހުން ކޯޓަށް ހުށަހަޅައި ހިނގަމުންދާ ދައުވާތަކާއި، އިސްތިއުނާފުކޮށް ހިނގަމުންދާ އިސްތިއުނާފް ތަކާއި، މައްސަލަތަކުގައި ހައްޔަރު ކޮށްފައި އަދި ބަންދުކޮށްފައި ތިބި މީހުންގެ ބަންދާ ގުޅޭގޮތުން ޝަކުވާ ހުށަހެޅުމަށް ހުޅުވާލި މި ފުރުސަތުގައި ޖުމްލަ 539 ޝަކުވާ އޮފީހަށް ލިބިފައިވާ ކަމަށެވެ.
ހުށަހަޅާފައިވާ ޝަކުވާތަކާއި، މުރާޖައާކުރުމަށް އެދި ހުށަހަޅާފައިވާ ހުށަހެޅުންތަކާ ގުޅިގެން ބަލަންޖެހޭ ކަންކަން ބަލަމުންދާ ކަމަށް ޕީޖީ އޮފީހުން ވަނީ ބުނެފައެވެ. އަދި ބަލަންޖެހޭ ބެލުންތައް ބަލައި މުރާޖައާކުރުމަށްފަހު، ޕީޖީ އޮފީހުން ނިންމާ ގޮތެއް ހުށަހެޅި ފަރާތްތަކާ ހިއްސާކުރާނެ ކަމަށް ވެސް އެ އޮފީހުން ވަނީ ބުނެފައެވެ.
މަގާމާ ހަވާލުވެވަޑައިގަތުމަށް ފަހު ބޭއްވި ފުރަތަމަ ނޫސްވެރިންގެ ބައްދަލުވުމުގައި ޕީޖީ އައްބާސް ވިދާޅުވީ ވޭތުވެދިޔަ 3 ހަފްތާގެ ތެރޭ ސިޓީ، އެސްއެމްއެސް އަދި އީމެއިލް މެދުވެރިކޮށް ގިނަ ބަޔަކު ޝަކުވާ ހުށަހަޅާފައިވާ ކަމަށެވެ. އަދި ޝަކުވާ ހުށަހެޅުމުގެ ފުރުސަތު ހުޅުވާލަން ނިންމަވާފައިވާ ކަމަށެވެ.
