އާޓިފިޝަލް ބީޗު ކައިރިން ކަފިހި ހުރަސް މަތީ އަނެއްކާވެސް އެކްސިޑެންޓެއް

އާޓިފިޝަލް ބީޗު ކައިރިން ކަފިހި ހުރަސް މަތީ އަނެއްކާވެސް އެކްސިޑެންޓެއް ހިނގައިފިއެވެ.

ފުލުހުން ބުނީ މިއަދު 16:10ހާއިރު އާޓިފިޝަލް ބީޗު ކައިރިން ކަފިހި ހުރަސް މަތިން ހިނގާފައިދިޔަ އަންހެނެއްގެ ގައިގައި ކާރަކުން ޖެހި އެކްސިޑެންޓުވި މައްސަލައެއް ފުލުހުންނަށް ރިޕޯޓު ކޮށްފައިވާ ކަމަށެވެ.

އެ އަންހެން މީހާ ފަރުވާއަށް އޭޑީކޭ ހޮސްޕިޓަލަށް ގެންގޮސްފައިވާ ކަމަށްވެސް ފުލުހުން ވަނީ ބުނެފައެވެ. ފުލުހުން ބުނީ މި މައްސަލަ އިތުރަށް ތަހުގީގު ކުރަމުން ދާ ކަމަށެވެ.

މި މަހުގެ 10 ވަނަ ދުވަހުވެސް ވަނީ މަޖީދީ މަގު ވިލާ މާޓު ކައިރި ކަފިހިހުރަހުން މަގު ހުރަސް ކުރަން އުޅުނު 3 އަހަރުގެ އަންހެން ކުއްޖެއްގެ ގައިގައި ސައިކަލަކުން ޖެހި އެކްސިޑެންޓެއް ހިނގާފައެވެ. ފުލުހުން ބުނީ މި ހާދިސާގައި އެ ކުއްޖާ ވެއްޓި، ކުއްޖާގެ ނިއްކުރިއަށް ގެއްލުންވެފައިވާ ކަމަށެވެ.

މާލޭގައި ހިނގާ އެކްސިޑެންޓުތައް ދުވަހެއް ދުވަހަކަށް އިތުރުވެފައި ވާއިރު، މި މައްސަލަ އަށް ހައްލެއް ގެނައުމަށްޓަކައި ފުލުހުން ވަނީ ހާއްސަ އޮޕަރޭޝަނެއްވެސް ފަށާފައެވެ. އެގޮތުން ކޮންމެ މީހަކުވެސް މަގު މަތީގައި ދުއްވާތާ 5 މިނަޓު ވާއިރު ފުލުހަކު ފެންނާނެ ހެން ވަނީ އުސޫލެއް އެކުލަވާލާފައެވެ.