ދުނިޔޭގެ ފެންވަރުގައި ކަނޑުގެ ވެށި ހިމާޔަތްކުރުމުގެ މުހިންމުކަމާއި އެކަމަށްޓަކައި ގައުމުތައް ގުޅިގެން މަސައްކަތްކުރުމުގެ މުހިންމުކަމުގެ މައްޗަށް ރައްޔިތުންގެ މަޖިލީހުގެ ނައިބު ރައީސް މުހައްމަދު ނާޒިމް އާއި ޗައިނާގެ ޝަންޑޮން ޕްރޮވިންސްގެ ގަވަރުނަރު ޒައު ނައުޒިއަން މަޝްވަރާކުރައްވައިފިއެވެ.
ދުނިޔޭގެ ފެންވަރުގައި ކަނޑުގެ ވެށި ހިމާޔަތްކުރުމުގެ ގޮތުން ޗައިނާގައި މިހާރު ކުރިއަށްދާ ގްލޯބަލް އޯޝަން ޑިވެލޮޕްމެންޓް ފޯރަމްގައި ބައިވެރިވެވަޑައި ގަތުމަށް ކުރައްވާ ދަތުރުފުޅުގައި ނާޒިމް ވަނީ ގަވަރުނަރު ޒައު ނައުޒިއަން އާއި ބައްދަލުކުރައްވާފައެވެ.
މި ބައްދަލުވުމުގައި ކަނޑުގެ ވެށި ކިލަނބުވުމަށް މެދުވެރިވާ ކަންތައްތަކުން ކަނޑުގެ ވެށި ސަލާމަތްކުރުމަށް ބައިނަލްއަގާވާމީ ފެންވަރުގައި ގުޅިގެން މަސައްކަތްކުރުމުގެ މުހިންމުކަން ދެބޭފުޅުން ފާހަގަކުރެއްވިއެވެ. އަދި ގްލޯބަލް އޯޝަން ޑިވެލޮޕްމަންޓް ފޯރަމް ޝަރަފުވެރިކޮށްދިނުމުގެ، ދައުވަތު ދެއްވިކަމަށްޓަކައި ގަވަރުނަރާއި ޗައިނާ ސަރުކާރަށް މަޖިލީހުގެ ނައިބު ރައީސް ވަނީ ޝުކުރު އަދާކޮށްފައެވެ.
މި ބައްދަލުކުރެއްވުމުގައި، ނައިބު ރައީސާއެކު މިނިސްޓަރ އޮފް ފިޝަރީޒް އެންޑް އޯޝަން ރިސޯސަސް އަހްމަދު ޝިޔާމްވެސް ބައިވެރިވެވަޑައިގެންނެވިއެވެ. މި ބައްދަލުކުރެއްވުމަށްފަހު، މި ފޯރަމްގެ ބައިވެރިންނަށް ގަވަރުނަރު ދެއްވި ރޭގަނޑުގެ ފަރިއްކޮޅުގައި، ދިވެހި ވަފުދުގެ މެންބަރުން ވަނީ ބައިވެރިވެފައެވެ.
މި އަހަރުގެ ގްލޯބަލް އޯޝަން ޑިވެލޮޕްމަންޓް ފޯރަމް އޮންނާނީ އޮކްޓޯބަރު މަހުގެ 24 އަދި 25 ވަނަ ދުވަހު ޗައިނާގެ އިރުމަތީ ޝަންޑޮންގް ޕްރޮވިންސްގެ ޗިންގްޑާއޯ ސިޓީގައެވެ. 'ލެޓްސް 'ސީ' އަވާ ފިއުޗާސް – ޕްރޮމޯޓިން ބްލޫ ޕާޓްނަޝިޕްސް ފޯ ގްރޯތް އެންޑް ސަސްޓެއިނަބިލިޓީ' ގެ ދަށުން ކޮންމެ އަހަރަކު ބާއްވާ މި ފޯރަމަކީ ޝަންޑޮންގް ޕްރޮވިންޝަލް ޕީޕަލްސް ގަވާމަންޓާއި މިނިސްޓްރީ އޮފް ނެޗުރަލް ރިސޯސަސް އިން ބާއްވާ ފޯރަމެކެވެ.
