ހާއްސަ އެހީއަށް ބޭނުންވާ މީހުންނަށް މުޖުތަމައުގައި ފުރިހަމައަށް ބައިވެރިވެ، އާމްދަނީ ހޯދުމުގެ ފުރުސަތު ހޯދައިދިނުމަށް "އެމްޕަވާމަންޓް ހަބް" ގެ ނަމުގައި ހާއްސަ މަރުކަޒެއް ގާއިމުކުރުމުގެ މަސައްކަތްކުރަމުން އަންނަކަމަށް އިޖުތިމާއީ އަދި އާއިލީ ތަރައްގީއާ ބެހޭ ވުޒާރާއިން ބުނެފިއެވެ.
އެމްޕަވާމަންޓް ހަބް ގާއިމްކުރުމަށް މި މަރުކަޒު ހިންގާނެ ގޮތުގެ މޮޑެލް ފައިނަލް ކުރުމާއި މަރުކަޒު ހިންގާނެ ޖާގަ ކަށަވަރުކުރުމުގެ މަސައްކަތް މިހާރު ކުރަމުން އަންނައިރު އެ މިނިސްޓްރީން ބުނީ އެމްޕަވާމަންޓް ހަބަކީ ނުކުޅެދުންތެރިކަން ހުންނަ މީހުންނަށް ހުނަރު ދަސްކޮށްދީ، އެމީހުންގެ އުފެއްދުންތައް ވިއްކައި، ވަޒީފާ އަދާކުރެވޭނެ ފަދަ ހާއްސަ މަރުކަޒެއް ކަމަށެވެ. މިގޮތުން، މި މަރުކަޒު ގާއިމްކުރުމުގެ ނަތީޖާއެއްގެ ގޮތުން، އެމީހުންނަށް ބޭނުންވާ ހުނަރުތައް ދަސްކުރުމުގެ ފުރުސަތު ލިބި، އެމީހުންގެ ގާބިލުކަން އިތުރުވެ، އަމިއްލަ މަސައްކަތްތައް ފަށައި، އާމްދަނީ ހޯދުމުގެ ދޮރު ހުޅުވިގެންދާނެކަމަށް އެ މިނިސްޓްރީން ވަނީ ބުނެފައެވެ.
މި މަރުކަޒުގައި ނުކުޅެދުންތެރިކަން ހުންނަ މީހުންގެ އުފެއްދުންތައް ވިއްކުމުގެ ފުރުސަތު ލިބިގެންދާއިރު މިނިސްޓްރީން ބުނީ މިއީ އެމީހުންގެ ހުނަރާއި ގާބިލުކަން ދައްކުވައިދިނުމުގެ ރަނގަޅު ފުރުސަތެއްކަމަށެވެ. އަދި ނުކުޅެދުންތެރިކަން ހުންނަ މީހުންނަށް އެއްވެސް ހުރަހަކާއި ނުލާ ފަސޭހަކަމާއިއެކު ބޭނުންކުރެވޭނެ ފަދައިން އިމާރާތުގެ އިންތިޒާމްތައް ހަމަޖެއްސޭނެކަމަށް މިނިސްޓްރީން ވަނީ ބުނެފައެވެ. މި މަރުކަޒަކީ ނުކުޅެދުންތެރިކަން ހުންނަ މީހުންނަށް އެކްސެސިބަލް މާހައުލަކުން ހިދުމަތް ލިބިގެންދާނެ މަރުކަޒަކަށް ވެގެންދާނެއެވެ.
އިތުރަށް މިނިސްޓްރީން ބުނީ އެމްޕަވާމަންޓް ހަބުގައި ވިޔަފާރި ކުރުމުގެ ފުރުސަތު ހުޅުވިގެންދިއުމުގެ އިތުރުން، ނުކުޅެދުންތެރިކަން ހުންނަ މަސައްކަތްތެރިން ހޯދުމުގެ ފުރުސަތުވެސް ވިޔަފާރިތަކަށް ލިބިގެންދާނެކަމަށެވެ. އަދި މި މަރުކަޒުގެ ޒަރިއްޔާއިން ވިޔަފާރިތަކުގެ އުފެއްދުންތެރިކަން އިތުރުކޮށް، އިޖުތިމާއީ ޒިންމާ އަދާކުރުމަށް ވިޔަފާރިތަކަށް ހިތްވަރު ލިބިގެންދާނެކަން މިނިސްޓްރީން ވަނީ ފާހަގަކޮށްފައެވެ.
