ނަތީޖާ ނެރެދޭ މީހަކަށް ވުމުގައި ނަފްސާނީ ދުޅަހެޔޮކަން ބޮޑު ދައުރެއް އަދާކުރާކަމުގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ނަފުސާނީ ދުޅަހެޔޮކަމުގެ ދުވަހާ ގުޅިގެން ރައީސް 'އެކްސް' ގައި ކުރެއްވި ޕޯސްޓެއްގައި ވިދާޅުވީ އުފެއްދުންތެރި، ނަތީޖާތައް ނެރެދޭ މީހަކަށްވުމަށް އިންސާނާގެ ނަފްސާނީ ގާބިލްކަން ބޮޑު ދައުރެއް އަދާކުރާ ކަމަށެވެ. އަދި ސަލާމަތް ސިއްހަތުގެ ދެބައިކުޅަ އެއްބަޔަކީ ނަފުސާނި ދުޅަހެޔޮކަން ކަމުގައި ރައީސް ވިދާޅުވިއެވެ. ރައީސްގެ މި މެސެޖުގައިވަނީ ނަފުސާނީ ދުޅަހެޔޮކަމަށް ހާއްސަ ސަމާލުކަމެއް ދިނުމަށް އެދިވަޑައިގެންފައެވެ.
ދިވެހިރާއްޖޭގައި، ނަފްސާނީ ބަލިތަކުގެ މައްސަލަ ބޮޑުވެފައިވާއިރު، އެންޒައެޓީ ފަދަ ބަލިތައް ތަހައްމަލު ކުރަމުންދާ ފަރާތްތަކުގެ އަދަދު ދަނީ އިތުރުވަމުންނެވެ. މިސަރުކާރުން ނަފުސާނީ ސިއްހަތުގެ 24 ގަޑިއިރުގެ ގައުމީ ހެލްޕް ލައިނެއް ތައާރަފްކޮށްފައިވާއިރު، ރާއްޖޭގައި އާސަންދަ މެދުވެރިކޮށް ހިލޭ ފަރުވާ ހޯދޭނެ އިންތިޒާމުވަނީ ހަމަޖެހިފައެވެ.
ދުނިޔޭގެ ނިސްބަތުގައި ކޮންމެ 8 މީހަކުން އެކަކީ ނަފުސާނީ އުނދަގޫތަކެއް ތަހައްމަލުކުރަމުންދާ މީހެއްކަން ދުނިޔޭގެ ސިއްހަތު ޖަމްއިއްޔާއިންވެސް ވަނީ ފާހަގަކޮށްފައެވެ. ރައީސް ޑރ. މުއިއްޒުގެ ސަރުކާރުގެ އަމާޒަކީ ނަފްސާނީ ސިއްހަތަށް ފުޅާދާއިރާއެއްގައި އިންވެސްޓްކޮށް ، ނަފްސާނީ ސިއްހަތުގެ ރަނގަޅުފަރުވާ ފަސޭހައިން ލުއިގޮތެއްގައި ލިބޭނެ އިންތިޒާމު ހަމަޖައްސައި ދިނުމެވެ.
