ދުނިޔޭގެ އެންމެ ބޮޑު ކާގޯ ޝިޕިން ލައިން ކަމަށްވާ މާއަސްކް ލައިންސް، އެމްއެސްސީގެ ބޯޓެއް ރާއްޖޭގައި ބަނދަރުކޮށްފައިވާ އިރު، އެ ބޯޓަށް މޯލްޑިވްސް ޕޯޓްސް އޮތޯރިޓީ އިން މަރުހަބާ ކިޔައިފިއެވެ.
މިއަދު ރާއްޖެއަށް ބަނދަރުކޮށްފައި ވަނީ އެމްއެސްސީގެ "އެމްއެސްސީ މަނަސާ އެފް" ނަމަކަށް ކިޔާ ބޯޓެކެވެ. މި ބޯޓަށް މަރުހަބާ ކިއުމަށް މާލެ ވިޔަފާރި ބަނދަރުގައި ހާއްސަ ހަފްލާއެއް ބާއްވާފައިވާ އިރު، އެ ހަފްލާގައި އެމްޕީއެލްއިން ވަނީ އެބޯޓަށް ވޯޓާ ސެލިއުޓެއް ދީފައެވެ.
އެމްޕީއެލް އިން މައުލޫމާތު ދެމުން ބުނީ، މި ބޯޓު މިއަދު ރާއްޖެ އައިސްފައި ވާ އިރު 800 ކޮންޓެއިނަރުގެ މުދާ ވަނީ ރާއްޖެއަށް ގެނެސްފައި ކަމަށެވެ. އޭގައި ހިމެނެނީ ޖެނެރަލް ކާގޯ ކަމަށް ވެސް އެމްޕީއެލް އިން ބުނެއެވެ.
އެމްއެސްސީ މަނަސާ އެފް ބޯޓު ރާއްޖެ އައުން ފާހަގަކުރުމަށް މާލޭގެ ވިޔަފާރި ބަނދަރުގައި ބޭއްވި ރަސްމިއްޔާތުގައި ބޯޓުގެ ކެޕްޓަނަށް އެމްޕީއެލްގެ އަދި ސެންޗޫރިއަންގެ ފަރާތުން ހަނދާނީ ފިލައެއް ވަނީ އަރުވާފައެވެ. މި ބޯޓު ރާއްޖެ ގެނެސްފަ އިވަނީ ސެންޗޫރިއަންއިން ކަމަށް އެމްޕީއެލް އިން ބުނެއެވެ. ސެންޗޫރިއަން އަކީ މުދާ ގެނެސް، އުފުލައިދޭ ރާއްޖޭގެ ލޮޖިސްޓިކްސް ކުންފުންޏެކެވެ.
މިރަސްމިއްޔާތަށްފަހު ނޫސްވެރިންނާ ވާހަކަދައްކަވަމުން މޯލްޑިވްސް ޕޯޓްސް ލިމިޓެޑް، އެމްޕީއެލްގެ ސީއީއޯ މުހައްމަދު ވަޖީހް އިބްރާހިމް ވިދާޅުވީ ދުނިޔޭގެ އެންމެ ބޮޑު ޝިޕިން ލައިނުން ރާއްޖެއަށް ކާގޯ ގެންނަން ފެށުމަކީ، މުދާ ގެންނަ ފަރާތްތަކަށް ލިބޭ ބޮޑު ލުޔެއް ކަމަށެވެ. ބޮޑެތި ޝިޕިން ލައިނާތަކުން ރާއްޖެއަށް ކާގޯ ގެންނަން ފެށުމުން، ރާއްޖެއަށް މުދާ ގެނައުމުގައި ވަރަށް ބޮޑަށް ފަސޭހަވާނެ ކަމަށާއި މިހާރުވެސް ވަރަށް ގިން މުދާ ރާއްޖެއަށް ނުގެނެވި ފުނި ޖެހިފައިވާ ކަަމށް ވަޖީހް ވިދާޅުވިއެވެ.
