ރައީސް މުހައްމަދު މުއިއްޒު، އިންޑިއާގެ ބޮޑު ވަޒީރު ނަރެންދްރަ މޯދީ އާއިއެކު ބޭއްވި ބައްދަލުކުރެއްވުމުގައި، ރާއްޖެއަށް ވަޑައިގަތުމުގެ ދައުވަތު ދެއްވައިފިއެވެ.
އިންޑިއާގެ ބޮޑުވަޒީރާއެކު ބޭއްވި މަޝްވަރާ ބައްދަލުވުމަށްފަހު ދެ ބޭފުޅުން ދެއްވި ބަޔާނުގައި ރައީސް ވިދާޅުވީ ރާއްޖެ އާއި އިންޑިއާ ދެމެދު ޑިޕްލޮމެޓިކް ގުޅުން ގާއިމް ކުރިތާ 60 އަހަރު ފުރުމުގެ މުނާސަބަތުގައި އަންނަ އަހަރު ރާއްޖެ ވަޑައިގަތުމަށް މޯދީ އަށް ދައުވަތު އަރުވާ ކަމަށެވެ. އިންޑިއާއަކީ ރާއްޖޭގެ ތަރައްގީގައި މުހިންމު ބައިވެރިއެއް ކަން ފާހަގަކުރައްވަމުން މުއިއްޒު ވިދާޅުވީ ރާއްޖެ އަބަދުވެސް ދެމި އޮންނާނީ އިންޑިއާގެ ހަގީގީ އެކުވެރިއެއްގެ ގޮތުގައިކަމަށެވެ.
ދެ ގައުމުގެ ވެރިން ދެއްކެވި ވާހަކަފުޅުގެ ތެރެއިން، މޯދީވަނީ ކުރިއަށް އޮތް ތަނުގައި ރާއްޖޭގައި އިންޑިއާގެ އިންސްޓެންޓު ސިސްޓަމް، ޔުނިފައިޑް ޕޭމަންޓު އިންޓަފޭސް (ޔޫޕީއައި)ގެ ހިދުމަތް ފަށާނެކަމަށް ވިދާޅުވެފައެވެ.
އަންނަ ބުރާސްފަތި ދުވަހުގެ ނިޔަލަށް ރައީސްގެ ދެކަނބަލުން އިންޑިއާއަށް ކުރައްވާ މި ދަތުރުފުޅުގައި އިންޑިއާގެ ވެރިރަށް ނިއު ދިއްލީގެ އިތުރުން އާގަރާ އާއި މުމްބާއީ އަދި ބެންގަލޫރަށް ވަޑައިގެން ރަސްމީ ބައްދަލުވުންތަކާ، ދެ ގައުމުގެ ވިޔަފާރީގެ ގުޅުން ވަރުގަދަ ކުރުމަށް މަޝްވަރާތައްކުރުމަށް ވަނީ ހަމަޖެހިފައެވެ.
