މާލޭގައި ރޭ ހިނގި ނުރައްކާތެރި އެކްސިޑެންޓްގައި އަނިޔާވި މީހަކަށް ފަރުވާ ދެމުން އަންނަކަމަށް ފުލުހުން ބުނެފިއެވެ.
ފުލުހުން ބުނީ ރޭ 12:53 ހާއިރު ބޮޑުތަކުރުފާނު މަގާއި ކޮއިމަލާ ހިނގުން ގުޅޭ ކަންމަތިން ކާރަކާއި ސައިކަލެއް ޖެހިގެން އެކްސިޑެންޓެއް ހިނގާފައިވާކަމުގެ މައްސަލަ ފުލުހުންނަށް ރިޕޯޓުކޮށްފައިވާ ކަމަށެވެ.
މި މައްސަލައިގައި އަނިޔާވެގެން ސައިކަލު ދުއްވަން އިން 21 އަހަރުގެ ދިވެހި ފިރިހަނަކަށް އަނިޔާވެފައިވާކަމަށް ފުލުހުން ވަނީ ބުނެފައެވެ. އަދި އޭނާއަށް އައިޖީއެމްއެޗް ގައި ފަރުވާ ދެމުން އަންނަކަމަށް ވެސް ފުލުހުން ވަނީ ބުނެފައެވެ.
މި މައްސަލަ ފުލުހުން ތަހުގީގުކުރަމުން އަންނައިރު، މި މައްސަލަ އާއި ގުޅިގެން އެއްވެސް މީހަކު ހައްޔަރުކޮށްފައިވާކަމެއް އަދި ފުލުހުން ހާމަކޮށްފައެއް ނުވެއެވެ.
މި އެކްސިޑެންޓުގެ ފޮޓޯތައް ސޯޝަލް މީޑިއާގައި ދައުރުވަމުން އަންނައިރު އެކްސިޑެންޓުވި ކާރަށާއި ސައިކަލަށް އެކިވަރުގެ ގެއްލުން ވެފައިވެއެވެ. އެ ގޮތުން ކާރުގެ އެއްފަޅިން، ކުރީ ކޮޅު ވަރަށް ބޮޑަށް ހަލާކުވެފައިވާއިރު ސައިކަލުގެ ކުރީކޮޅުވެސް ވަނީ ހަލާކުވެފައެވެ.
