މި އަހަރުގެ ގައުމީ އިނާމު 7 ބޭފުޅަކަށާއި، ހިތްވަރު ދިނުމުގެ ގައުމީ އިނާމު 10 ބޭފުޅަކަށާއި، ކުންފުންޏަކަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ދެއްވައިފިއެވެ.
މި އިނާމުތައް ދެއްވާފައި ވަނީ މިއަދު ފާހަގަކުރާ ރާއްޖޭގެ ގައުމީ ދުވަހުގެ މުނާސަބަތުގައި ދަރުބާރުގޭގައި ބޭއްވި ރަސްމީ ޖަލްސާގައެވެ. ޝަރަފުވެރިކަމުގެ ގައުމީ އިނާމު ލިބިވަޑައިގެންނެވި ބޭފުޅުންނަށް ރައީސް ދެއްވީ، ޝަރަފުގެ އައްޑަނައާއި، ޝަރަފުގެ ބެޖެވެ. ހިތްވަރު ދިނުމުގެ ގައުމީ އިނާމު ލިބިވަޑައިގެންނެވި ބޭފުޅުންނަށް ރައީސް ދެއްވީ، ހަނދާނީ ފިލައެކެވެ.
މިއަދު ޝަރަފުވެރިކަމުގެ ޤައުމީ އިނާމު ލިބިވަޑައިގެންނެވި 7 ބޭފުޅުންނަކީ:
- ދެމިހުންނަނިވި ހާއްސަ ހިދުމަތެއް ކުރެއްވުމުގެ ދާއިރާއިން ހ. ހާޖަރާގޭ، މުހައްމަދު ތައުފީގް
- ސިއްހީ ދާއިރާއިން ވ. އަކީލާ، ޑރ. އަބްދުލްއަޒީޒް ޔޫސުފް
- ކުދި ފަންތިއާއި މެދު ފަންތީގެ ވިޔަފާރީގެ ދާއިރާއިން ހުޅުމާލެ ފްލެޓް ނަންބަރު 02-3-7، މުހައްމަދު މާޖިދު
- ހަބަރާއި މައުލޫމާތު ފެތުރުމުގެ ދާއިރާއިން މ. ހުސްނޫ، މޫސާ ލަތީފް
- ކުޅިވަރުގެ ދާއިރާއިން މ. މެޓްރޯވިލާ، މުހައްމަދު ނާސިރު
- ކުޅިވަރުގެ ދާއިރާއިން ވ. ރޭދުވާ، އަހްމަދު މުހައްމަދު
- ޕާފޯމިން އާޓްސްގެ ދާއިރާއިން ވ. ކަންދު، ރޯނުގޭ ހަސަންމަނިކު
ހަމައެހެންމެ ހިތްވަރު ދިނުމުގެ ގައުމީ އިނާމު 10 ބޭފުޅަކަށް ދެއްވާފައިވާއިރު އެ އިނާމު މި އަހަރު ދިން ކުންފުންޏަކީ ވިޔަފާރި އާއި އިގުތިސާދީ ދާއިރާއިން، ވިޔަފާރި ފުޅާކޮށް ތަރައްގީ ކުރުމުގެ ރޮނގުން ރިޔަން ޕްރައިވެޓް ލިމިޓެޑަށެވެ.
ގައުމީ އިނާމަކީ، ދިވެހި ގައުމާއި ދިވެހި މުޖުތަމަޢުގެ ލާބައާއި މަންފާއަށްޓަކައި ވަކިވަކި ފަރުދުންނާއި، މަދަނީ މުއައްސަސާތަކުންނާއި، މަދަނީ ޖަމުއިއްޔާތަކާއި ޖަމާއަތްތަކުންނާއި، ވިޔަފާރި އިދާރާތަކުން ދެމެހެއްޓެނިވި ގޮތެއްގައި ދިވެހި ގައުމުގެ ތަރައްގީގައި ކުރަމުންގެންދާ މަސައްކަތްތަކުގައި، އެ ފަރާތްތަކުން ހޯދާ ކުރިއެރުންތައް ބަލައިގަނެ، އެ ކަންކަމުގެ އަގު ވަޒަންކޮށް، އެ ފަރާތްތަކަށް ހިތްވަރުދިނުމުގެ މަގްސަދުގައި ދޭ އިނާމެކެވެ.
ގައުމީ އިނާމުގެ ގޮތުގައި ދެމުން ދަނީ ޝަރަފުވެރިކަމުގެ ގައުމީ އިނާމާއި، ހިތްވަރުދިނުމުގެ ގައުމީ އިނާމެވެ.
